ଭୁବନେଶ୍ୱର : ବଲିଉଡ୍ ଅଭିନେତ୍ରୀ ବିଦ୍ୟା ବାଲାନ ସମ୍ବଲପୁରୀ ଶାଢ଼ିକୁ ଖୁବ୍ ପ୍ରଶଂସା କରିଥିବା ବେଳେ ଏହି ଶାଢ଼ି ପିନ୍ଧି ସେ ସଦ୍ୟ ମୁକ୍ତିଲାଭ କରିଥିବା ତାଙ୍କ ଅଭିନୀତ ଚଳଚ୍ଚିତ୍ର ‘ଶକୁନ୍ତଳା ଦେବୀ’ର ସୋସିଆଲ ମିଡିଆ ପ୍ରଚାର କରିଥିଲେ। ତେବେ ଏହି ଶାଢ଼ିଟି ବିଦ୍ୟା ବାଲାନଙ୍କୁ ପିନ୍ଧାଇବା ପଛରେ ପ୍ରମୁଖ ଭୂମିକା ଗ୍ରହଣ କରିଥିଲା ଅମ୍ରିତା ସାବତଙ୍କ ‘ଉତ୍କଳ ଅମ୍ରିତା’ ବ୍ରାଣ୍ଡ୍। ବର୍ଷେ ତଳେ ଯେବେ ମୁମ୍ବାଇରେ ‘ଉତ୍କଳ ଅମ୍ରିତା’ ବ୍ରାଣ୍ଡ୍ ଏକ ପ୍ରଦର୍ଶନୀରେ ସାମିଲ୍ ହୋଇଥିଲା ସେତେବେଳେ ବିଦ୍ୟା ବାଲାନଙ୍କ ଟିମ୍ ସହ ଯୋଗାଯୋଗ କରିଥିଲେ ଅମ୍ରିତା ସାବତ। ଶାଢ଼ିର ଡିଜାଇନ୍ ଦେଖିବା ପରେ ତାଙ୍କ ଟିମ୍କୁ ବହୁତ ପସନ୍ଦ ଆସିଥିଲା। ଶେଷରେ ଏହି ଶାଢ଼ିଟି ବିଦ୍ୟା ‘ଶକୁନ୍ତଳା ଦେବୀ’ ମୁକ୍ତିଲାଭ ସମୟରେ ପିନ୍ଧିବେ ବୋଲି ବିଦ୍ୟାଙ୍କ ଟିମ୍ ଜଣାଇଥିଲେ। ରମାକାନ୍ତ ମେହେର ଶାଢ଼ିଟି ପ୍ରସ୍ତୁତ କରିଥିବା ବେଳେ ତାହା ଗତ ୨୨ତାରିଖରେ ବିଦ୍ୟାଙ୍କୁ ପଠାଯାଇଥିଲା। ବିଦ୍ୟା ୨୫ତାରିଖରେ ଶାଢ଼ିଟି ପିନ୍ଧି ତାଙ୍କୁ ବହୁତ ପସନ୍ଦ ହେଇଛି ବୋଲି କହିଥିଲେ। ଗାଣିତିକ ସମୀକରଣ ଥିବା ଏହି ଶାଢ଼ିଟି ବିଦ୍ୟା ପିନ୍ଧିବା ପରେ ‘ଉତ୍କଳ ଅମ୍ରିତା’ର ମୁଖ୍ୟ ଅମ୍ରିତାଙ୍କ ନିକଟକୁ ଏକ ଭିଡିଓ ବିଦ୍ୟାଙ୍କ ଟିମ୍ ପଠାଇଥିଲେ। ତେବେ ଗତକାଲି ବିଦ୍ୟା ଯେବେ ଶାଢ଼ିଟି ପିନ୍ଧି ‘ଶକୁନ୍ତଳା ଦେବୀ’ର ପ୍ରଚାର କରୁଥିଲେ, ତାହା ଚର୍ଚ୍ଚାକୁ ଆସିଥିଲା। ଏ ନେଇ ଅମ୍ରିତା କହିଛନ୍ତି, ଆମ ଓଡ଼ିଆ ତାରକାମାନେ ମଧ୍ୟ ଅଭିନୟ ସମୟରେ ବୁଣାକାରଙ୍କ ଦ୍ବାରା ପ୍ରସ୍ତୁତ ଶାଢ଼ି ପିନ୍ଧିବା ଆବଶ୍ୟକ। ଏହାଦ୍ବାରା ଆମ ହସ୍ତତନ୍ତର ପ୍ରଚାର ପ୍ରସାର ହେବା ସହ ବୁଣାକାରମାନେ ରୋଜଗାରକ୍ଷମ ହୋଇପାରିବେ।
ସମ୍ବଲପୁରୀ ଶାଢ଼ିର ପ୍ରଶଂସାରେ ଶତମୁଖ ବିଦ୍ୟା ବାଲାନ
Share Now: