ସିଓଲ୍: ବାଲିଷ୍ଟିକ୍ କ୍ଷେପଣାସ୍ତ୍ର ପରୀକ୍ଷା କରି ଉତ୍ତର କୋରିଆ ଜାପାନ ଏବଂ ଆଖପାଖ ଅଞ୍ଚଳର ଶାନ୍ତି ଓ ସୁରକ୍ଷା ପ୍ରତି ବିପଦର କାରଣ ହୋଇଥିବା କଥା ଜାପାନର ପ୍ରଧାନମନ୍ତ୍ରୀ ୟୋଶିହିଡ଼େ ସୁଗା କହିଛନ୍ତି। ଉତ୍ତର କୋରିଆର କ୍ଷେପଣାସ୍ତ୍ର ପରୀକ୍ଷା ସଂକ୍ରାନ୍ତ କାର୍ଯ୍ୟକ୍ରମ ଉପରେ ଦୃଷ୍ଟି ରଖିବାକୁ ଓ୍ଵାସିଂଟନ୍ ଏବଂ ସିଓଲ୍କୁ ଟୋକିଓ ସହଯୋଗ କରିବ ବୋଲି ମଧ୍ୟ ସେ କହିଛନ୍ତି। ଦକ୍ଷିଣ କୋରିଆର ‘ଜଏଣ୍ଟ୍ ଚିଫ୍ସ୍ ଅଫ୍ ଷ୍ଟାଫ୍’ କହିଛନ୍ତି ଯେ, ଉତ୍ତର କୋରିଆର ପୂର୍ବତଟବର୍ତ୍ତୀ ଅଞ୍ଚଳରୁ ସକାଳ ପ୍ରାୟ ୭:୬ରୁ ୭:୨୫ ମଧ୍ୟରେ ଏହି କ୍ଷେପଣାସ୍ତ୍ରଗୁଡ଼ିକର ବ୍ୟବହାରିକ ପରୀକ୍ଷା ହୋଇଛି।
୬୦ କିଲୋମିଟର୍ ଉଚ୍ଚରେ ୪୫୦ କିଲୋମିଟର୍ ଗତି କରିବା ପରେ କ୍ଷେପଣାସ୍ତ୍ରଗୁଡ଼ିକ ସମୁଦ୍ରରେ ପଡ଼ିଥିଲା। ଯୁକ୍ତରାଷ୍ଟ୍ର ଆମେରିକାର ଇଣ୍ଡୋ-ପାସିଫିକ୍ କମାଣ୍ଡ୍ର ମୁଖପାତ୍ର କ୍ୟାପ୍ଟେନ୍ ମାଇକ୍ କାଫ୍କା କହିଛନ୍ତି, ଏହି କ୍ଷେପଣାସ୍ତ୍ର ସଂକ୍ରାନ୍ତରେ ଯୁକ୍ତରାଷ୍ଟ୍ର ଆମେରିକା ଜାଣିଛି। ମିତ୍ର ରାଷ୍ଟ୍ରମାନଙ୍କ ସହ ବିଚାରବିମର୍ଶ କରିବା ସହ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛି। ଆଣବିକ ଅସ୍ତ୍ରଶସ୍ତ୍ର କାର୍ଯ୍ୟକ୍ରମକୁ ସୁଦୃଢ଼ କରିବେ ବୋଲି ଅଳ୍ପ ଦିନ ତଳେ ଦେଇଥିବା ଭାଷଣରେ କିମ୍ ପ୍ରତିଜ୍ଞାବଦ୍ଧ ହୋଇ ଘୋଷଣା କରିଥିଲେ। ଏହାଛଡ଼ା, ଉତ୍ତର କୋରିଆ ଓ ଆମେରିକା ସମ୍ପର୍କର ଭାଗ୍ୟ ଓ୍ଵାସିଂଟନ୍ ଉପରେ ନିର୍ଭର କରେ ବୋଲି ମଧ୍ୟ ସେ କହିଥିଲେ।
