ଭୁବନେଶ୍ୱର: ଗତ କାଲି ରାତିରେ ସୁଦୀପ୍ତ ସାହୁ ନାମକ ଜଣେ ଯୁବକ ଓଡ଼ିଆ ଚଳଚ୍ଚିତ୍ର ଜଗତର ବର୍ଷିଆନ ଅଭିନେତା ଜୟୀରାମ ସାମଲ ଓର୍ଫ ଜୟୀଙ୍କୁ ନେଇ ‘ଜୟୀ ଭାଇ ଦୁନିଆ ଛାଡ଼ି ଚାଲିଗଲେ’ ଶୀର୍ଷକରେ ଏକ ଫଟୋ ଫେସ୍ବୁକ୍ରେ ପୋଷ୍ଟ କରିବା ପରେ ଚଳଚ୍ଚିତ୍ର ପ୍ରେମୀଙ୍କ ମହଲରେ ଆଲୋଡ଼ନ ଖେଳି ଯାଇଥିଲା। ଘଟଣାର ସତ୍ୟାସତ୍ୟରୁ ସେ ବର୍ତମାନ ସମ୍ପୂର୍ଣ ସୁସ୍ଥ ଥିବା ଜଣାପଡିଛି । ନିକଟରେ ତାଙ୍କ ଅଭିନୀତ ‘ଟିକେ ଅନାଡ଼ି ପୂରା ଖିଲାଡ଼ି’ ରିଲିଜ୍ ହୋଇଛି। ଏହି ନିକଟରେ ସେ ‘ଯୋଗୀ’ ଏବଂ ‘ମାଆ ଧାମରାଇ’ର ସୁଟିଂ ଶେଷ କରିଛନ୍ତି। ସେ ‘ସ୍ତ୍ରୀ’ ଚଳଚ୍ଚିତ୍ରରୁ ଅଭିନୟ ଜୀବନ ଆରମ୍ଭ କରିଥିଲେ। ତାଙ୍କର ଉଲ୍ଲେଖନୀୟ ସିନେମା ମଧ୍ୟରେ ରହିଛି ‘ଯାଯାବର’, ‘ଫୁଲ ଚନ୍ଦନ’, ‘ସହରୀ ବାଘ’, ‘ଜଗା ବଳିଆ’, ‘ଡୋରା’, ‘ପକା କମ୍ବଳ ପୋତ ଛତା’ ଇତ୍ୟାଦି। ୧୫୦ରୁ ଊର୍ଧ୍ୱ ଓଡ଼ିଆ ଚଳଚ୍ଚିତ୍ରରେ ଅଭିନୟ କରିଛନ୍ତି। ସେ କେବଳ ହାସ୍ୟଭିନେତା ନୁହଁନ୍ତି କେତେକ ଚରିତ୍ର ଏବଂ ଖଳଚରିତ୍ରରେ ମଧ୍ୟ ନଜର ଆସିଛନ୍ତି। ବର୍ତ୍ତମାନ ସେ ତାଙ୍କର କଟକର ତୁଳସୀପୁର ବାସବଭନରେ ରହୁଛନ୍ତି।
