ରାଞ୍ଚି: ଲେବୁଲକ୍ରସିଂର ଫାଟକ ବନ୍ଦ କରି ଶୋଇପଡିଲେ ଦାୟିତ୍ୱରେ ଥିବା କର୍ମଚାରୀ। ଆଉ ଦୀର୍ଘ ୩ ଘଣ୍ଟା ଧରି ଫାଟକ ବନ୍ଦ ଥିବାରୁ ଯାତାୟାତ ଠପ ହୋଇଯାଇଥିଲା। ଝାଡ଼ଖଣ୍ଡର ଓଟାରି ରୋଡ଼ ଓ କରକଟା ରେଳ ଷ୍ଟେସନ ମଧ୍ୟରେ ଥିବା ଚେଚରିଆ ଲେବୁଲକ୍ରସିଂରେ ଏଭଳି ଦୃଶ୍ୟ ସାମ୍ନାକୁ ଆସିଛି। ସୂଚନା ଥାଉ କି ଆଜି ସକାଳେ ଲେବୁଲକ୍ରସିଂର ଗେଟମ୍ୟାନ୍ ପିଙ୍କୁ କୁମାର ଚୌଧୁରୀ ମଦ୍ୟପାନ କରି ରେଳଫାଟକ ବନ୍ଦ କରିଦେଇଥିଲେ। ମଦ ପିଇ ସେ ନିଜ କୋଠରୀରେ ଶୋଇପଡ଼ିଥିଲେ।
ପାଖାପାଖି ୩ ଘଣ୍ଟା ଯାଏଁ ସେ ନ ଉଠିବାରୁ ଫାଟକ ବନ୍ଦ ରହିଥିଲା। ଆଉ ଫାଟକ ବନ୍ଦ ରହିଥିବା ଯୋଗୁଁ ଉଭୟ ପାର୍ଶ୍ୱରେ ଶତାଧିକ ଗାଡି ଅଟକି ରହିଥିଲା। ଟ୍ରେନ ଯାଉନଥିବାବେଳେ ଲମ୍ବା ସମୟ ଧରି ଫାଟକ ବନ୍ଦ ରହିଥିବାରୁ ଲୋକମାନେ ପାଟିତୁଣ୍ଡ କରିଥିଲେ। ଆଉ ଏହା ପରେ ଲୋକମାନେ ଆରପିଏଫ ଥାନାକୁ ଫୋନ କରି ଜଣାଇଥିଲେ। ଆରପିଏଫ ଇନ୍ସପେକ୍ଟର ଆରପି ସିଂ ଘଟଣାସ୍ଥଳରେ ପହଂଚିଥିଲେ। ସେଠାରେ ଅନ୍ୟ ଜଣେ ଗେଟମ୍ୟାନଙ୍କୁ ଡ୍ୟୁଟିରେ ରଖିବା ପରେ ସେ ରେଳ ଫାଟକ ଖୋଲି ଜାମ ଟ୍ରାଫିକକୁ ସ୍ୱାଭାବିକ କରିଥିଲେ।
