ସାକ୍ଷୀଗୋପାଳ : ମାରୱାଡି ମହିଳା ସମିତି ଭୁବନେଶ୍ୱର ଶାଖା ପକ୍ଷରୁ ଗୋବିନ୍ଦଜୀ ଗୌ-ଶାଳା (ସାକ୍ଷୀଗୋପାଳ ଠାରେ) ଗୌ-କାଷ୍ଠ ଯନ୍ତ୍ର ସ୍ଥାପନ କରାଯାଇଛି। ଏହାଦ୍ୱାରା ଅନେକ ଉପକାର ହୋଇ ପାରିବ। ଗୋବରକୁ ଉପଯୋଗ କରି ଗୌ-କାଷ୍ଠତିଆରି କରାଯାଇ ପାରିବ। ଶ୍ମଶାନରେ ଅନ୍ତ୍ୟେଷ୍ଟି କାର୍ଯ୍ୟରେ ଏହାକୁ ବ୍ୟବହାର କରାଯାଇ ପାରିବ। ଗୋଟିଏ ଅନ୍ତ୍ୟେଷ୍ଟି କାର୍ଯ୍ୟରେ ଅତି କମରେ ୪୦୦କିଲୋ କାଠର ଆବଶ୍ୟକତା ହୋଇଥାଏ। ଗୌ-କାଷ୍ଠ ବ୍ୟବହାର ହେଲେ ବହୁ ପରିମାଣରେ ଗଛକାଟିବା ବା ଗଛର ବ୍ୟବହାର କମ କରାଯାଇ ପାରିବ। ଗଛ କାଟିବା କମିଗଲେ ପ୍ରକୃତିରେ କିଛି ମାତ୍ରାରେ ସନ୍ତୁଳନ ରକ୍ଷା କରାଯାଇ ପାରିବ ବୋଲି କାର୍ଯ୍ୟକ୍ରମ ଉଦ୍ଘାଟନ କରି ମାରୱାଡି ମହିଳା ସମିତି ଭୁବନେଶ୍ୱର ଶାଖାର ସଭାନେତ୍ରୀ ରେଖା ଅଗ୍ରୱାଲ ନିଜ ଅଭିଭାଷଣରେ କହିଛନ୍ତି।
ଗୌ-କାଷ୍ଠର ବ୍ୟବହାର ପାଇଁ ଏବେ ଦିଲ୍ଲୀ ,ଝାରଖଣ୍ଡ,ମଧ୍ୟପ୍ରଦେଶ ଆଦି ରାଜ୍ୟରେ ରାଜ୍ୟ ସରକାରମାନେ ଅନୁମତି ପ୍ରଦାନ କରିଛନ୍ତି। ଏହାର ବ୍ୟବହାର ଦ୍ୱାରା ପ୍ରଦୂଷଣ କମ ହେବ। ତେଣୁ ଓଡିଶା ସରକାର ମଧ୍ୟ ଏ ଦିଗରେ ନିଜର ଦୃଷ୍ଟି ଦିଅନ୍ତୁ ତଥା ପ୍ରାରମ୍ଭିକ ଭାବେ ପୁରୀ ସ୍ୱର୍ଗଦ୍ୱାର ଠାରେ ଏହାର ବ୍ୟବହାର କରାଗଲେ ଅନେକ ଗୋଶାଳା ମଧ୍ୟ କିଛି କିଛି ସହଯୋଗ ପାଇ ସେଠାରେ ଥିବା ବୃଦ୍ଧ ଗୋମାତା ମାନେ ଉପକୃତ ହୋଇପାରିବେ। ଏହି କାର୍ଯ୍ୟକ୍ରମରେ ମାରୱାଡି ମହିଳା ସମିତି ଭୁବନେଶ୍ୱର ଶାଖାର କାର୍ଯ୍ୟକର୍ତ୍ତୀ ଓ ଗୋଶାଳାର କର୍ମକର୍ତ୍ତାମାନେ ଉପସ୍ଥିତ ଥିଲେ।