ବ୍ରହ୍ମପୁର: ବ୍ରହ୍ମପୁର ବଡ଼ମେଡିକାଲରେ ଆଜି ଏକ ହୃଦୟବିଦାରକ ଦୃଶ୍ୟ ଦେଖିବାକୁ ମିଳିଛି। ମେଡିକାଲ ପରିସରରେ କିଛି କୁକୁର ଏକ ନବଜାତ ଶିଶୁର ମୃତଦେହ ରାମ୍ପୁଡ଼ି ବିଦାରି ଖାଉଥିବା ଦୃଶ୍ୟ ଦେଖିବାକୁ ମିଳିଥିଲା। ଏହା ଦେଖି ଲୋକେ କୁକୁରଙ୍କୁ ସେଠାରୁ ଘଉଡ଼ାଇ ଥିଲେ। ସେହି ସମୟ ବେଳକୁ କୁକୁର ପଲ ଶିଶୁର ମୁଣ୍ଡ ଶରୀରରୁ ଛିଣ୍ଡାଇ ଅଲଗା କରି ଦେଇ ସାରିଥିଲେ। ଏଭଳି ଦୃଶ୍ୟ ରୋଗୀ ସମ୍ପର୍କୀୟଙ୍କୁ ବ୍ୟଥିତ କରିଥିଲା। ଘଟଣା ସମ୍ପର୍କରେ ମେଡିକାଲ କର୍ତ୍ତୃପକ୍ଷଙ୍କୁ ଖବର କରାଯାଇଥିଲା। ମୃତ ଶିଶୁର କୌଣସି ଦାବିଦାର ନଥିବାରୁ ଶବକୁ ମେଡିକାଲ ବର୍ଜ୍ୟବସ୍ତୁ ପ୍ଲାଣ୍ଟରେ ନଷ୍ଟ କରାଯାଇଥିଲା। ବଡ଼ ମେଡିକାଲରେ ନବଜାତ ଶିଶୁର ମୃତଦେହ କୁକୁର ଖାଇବା କିଛି ନୂଆ କଥା ନୁହେଁ। ବିଭିନ୍ନ ସମୟରେ ମୃତ ଶିଶୁ ଜନ୍ମ ହେଲେ କିମ୍ବା ଜନ୍ମ ପରେ ଶିଶୁର ମୃତ୍ୟୁ ଘଟିଲେ ଅଭିଭାବକ ଶବ ନପୋତି ଏଣେତେଣେ ଫୋପାଡ଼ି ଦେଇଥାନ୍ତି। ଫଳରେ କୁକୁର ପଲ ଶିଶୁ ଶବ ଖାଉଥିବା ଦେଖିବାକୁ ମିଳୁଛି। ଆଜି ମଧ୍ୟାହ୍ନ ସମୟରେ କିଛି କୁକୁର ଏକ ନବଜାତ ଶିଶୁର ମୃତଦେହ ଟାଣି ନେଉଥିବା ଦେଖିବାକୁ ମିଳିଥିଲା। ପୁରୁଣା ଇନଡୋର୍ କୋଠା ସମ୍ମୁଖରେ ଶିଶୁ ମୃତଦେହ କୁକୁର ଖାଉଥିବା ଦେଖି ଲୋକେ କୁକୁରପଲକୁ ସେଠାରୁ ଘଉଡ଼ାଇ ଥିଲେ। ପରେ ସଫେଇ କର୍ମଚାରୀଙ୍କ ସହାୟତାରେ ଶିଶୁର ମୃତଦେହକୁ ସେଠାରୁ ନିଆଯାଇଥିଲା। ମେଡିକାଲରେ କୌଣସି ନବଜାତ ଶିଶୁର ମୃତ୍ୟୁ ଘଟିବା ପରେ ଯଦି ପରିବାରବର୍ଗ ଶବ ନେବାକୁ ଇଚ୍ଛା କରନ୍ତି ନାହିଁ ତେବେ ମେଡିକାଲ ତରଫରୁ ଶବ ସଂଗ୍ରହ କରାଯାଇଥାଏ। ଏଥିପାଇଁ ପରିବାରବର୍ଗ ଲିଖିତ ଆକାରରେ ଜଣାଇଥାନ୍ତି। ସେହି ଶବକୁ ମେଡିକାଲ ବର୍ଜ୍ୟବସ୍ତୁ ପ୍ଲାଣ୍ଟ୍ରେ ନଷ୍ଟ କରାଯାଇଥାଏ। ଏଣୁ ଆଜି ମଳିଥିବା ଶବ ମେଡିକାଲର ନୁହେଁ, ତାହା ଆଖାପାଖ ନର୍ସିଂହୋମ୍ର ହୋଇଥାଇ ପାରେ ବୋଲି ଜଣେ ଅଧିକାରୀ କହିଛନ୍ତି।
