ମିଳିବ ଭୋଜି କରିବାର ସୁଯୋଗ
ଭୁବନେଶ୍ବର: ନୂଆ ରୂପ ନେବାକୁ ଯାଉଛି ନିକୋ ପାର୍କ। ସବୁ ବୟସର ଲୋକଙ୍କ ପାଇଁ ଚିତ୍ତବିନୋଦନର ଅନ୍ୟତମ ଆକର୍ଷଣର କେନ୍ଦ୍ର ଭାବରେ ନିର୍ମାଣ କରିବାକୁ ହୋଇଥିବା ଡିଜାଇନ୍ ଆଜି ଜାରି କରିଛି ବିଡିଏ। ଫନି ପରେ କ୍ଷତିଗ୍ରସ୍ତ ହୋଇଥିବା ଏହି ପାର୍କର ଉନ୍ନତୀକରଣ ନେଇ ଯୋଜନା ହୋଇଥିଲା। ପାର୍କ ଖୋଲିଥିଲେ ମଧ୍ୟ ବୋଟିଂ ସୁବିଧା ସହ ଅନ୍ୟାନ୍ୟ ମନୋରଞ୍ଜନ ବ୍ୟବସ୍ଥା ନଥିଲା। ଏଣୁ ଏହାକୁ ‘ସିଟିଜ୍’ ଯୋଜନା ଅଧୀନରେ ଉନ୍ନତୀକରଣ କରିବାକୁ ନିଷ୍ପତ୍ତି ହୋଇଛି। ଖୁବ୍ଶୀଘ୍ର ଏହାର ଉନ୍ନୟନ କାର୍ଯ୍ୟ ଆରମ୍ଭ ହେବ ବୋଲି ଜଣାପଡ଼ିଛି। ଏବେ ଏହାର ନବୀକରଣ କରାଯାଇ ଏକ ନୂଆ ରୂପ ଦିଆଯିବାକୁ ଯୋଜନା ହୋଇଛି। ସିଟିଜ୍ ଯୋଜନାରେ ଏଥିରେ ବୋଟିଂ ସୁବିଧା କରାଯିବା ସହ ନାଳ ମଝିରେ ଏକ ଦ୍ବୀପ ସଦୃଶ ଜାଗା ତିଆରି କରାଯିବ। ବୋଟିଂ କରୁଥିବା ବେଳେ ଲୋକମାନେ ଓହ୍ଲାଇ ସେହି ଦ୍ବୀପର ମଜା ନେଇ ପାରିବେ। ବସିବା ପାଇଁ ଏକ ନିର୍ଦ୍ଧାରିତ ଜାଗା ରହିବା ସହ ଚାଲିବା ପାଇଁ ରାସ୍ତା ତିଆରି ହେବ। ବ୍ୟାପକ ବୃକ୍ଷ ରୋପଣ କରାଯାଇ ଏକ ଜଙ୍ଗଲର ଅନୁଭୂତି ଦିଆଯିବାକୁ ଉଦ୍ୟମ କରାଯିବ। ଏଠାରେ ଭୋଜି କରିବାର ସୁଯୋଗ ଦିଆଯିବ। ସେଥିପାଇଁ ପିଣ୍ଡି ନିର୍ମାଣ କରାଯିବାକୁ ଯୋଜନା ହୋଇଛି।
