ଭୁବନେଶ୍ୱର: କଟକବାସୀଙ୍କ ପାଇଁ ଏକ ଖୁସି ଖବର। ଖୁବଶୀଘ୍ର କଟକ ସହରକୁ ଗଡ଼ିବ ୩୦ଟି ‘ମୋ ବସ୍’। ତେବେ ୪ଟି ନୂଆ ରୁଟରେ ଏହି ବସ ଯାତାୟତ କରିବ। ଗତ ୧ ତାରିଖଠାରୁ ରାଜଧାନୀ ଭୁବନେଶ୍ୱରର ‘ମୋ ବସ୍’ ସେବାରେ ୧୦ଟି ଇ-ବସ୍ ଯୋଡ଼ି ହୋଇଥିଲା। ବସଗୁଡ଼ିକ ପ୍ରାଥମିକ ପର୍ଯ୍ୟାୟରେ ଭୁବନେଶ୍ୱରର ୩୦ଟି ରୁଟରେ ଚଳାଚଳ କରିଥିଲା। ତେବେ କଟକ ସହରକୁ ଆଉ ୩୦ଟି ‘ମୋ ବସ୍’ ଯାତାୟତ କରିବା ସହରବାସୀଙ୍କ ପାଇଁ ନିଶ୍ଚିତ ଭାବେ ଏକ ଖୁସି ଖବର। ବିଜୁ ପଟ୍ଟନାୟକ ଛକରୁ ଚାରବାଟିଆ, ବାରବାଟୀ ଷ୍ଟାଡିୟମରୁ ସାଲେପୁର, ଭୁବନେଶ୍ୱର ରେଲୱେ ଷ୍ଟେସନରୁ ଏସସିବି ମେଡିକାଲ ଓ ଧବଳେଶ୍ୱରରୁ କନ୍ଦରପୁର ପରି ୪ଟି ରୁଟରେ ‘ମୋ ବସ୍’ ଚଳାଚଳ କରିବ। ଆସନ୍ତା ୮ ତାରିଖରୁ ଏହି ସେବା ଆରମ୍ଭ ହେବ ବୋଲି କ୍ୟାପିଟାଲ ରିଜିଅନ ଅର୍ବାନ ଟ୍ରାନ୍ସପୋର୍ଟ (କ୍ରୁଟ) ପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ ଯେ, ଦିନକୁ ଦିନ ‘ମୋ ବସ’ର ଚାହିଦା ବଢ଼ିବାରେ ଲାଗିଛି। ଜନସାଧାରଣ ଆଜିକାଲି ‘ମୋ ବସ’ରେ ଯିବାଆସିବା କରିବାକୁ ଅଧିକ ପସନ୍ଦ କରୁଛନ୍ତି। ଗତ ମାସ ୧ ତାରିଖରୁ ୧୫ ତାରିଖ ମଧ୍ୟରେ ୨୨ ଲକ୍ଷରୁ ଅଧିକ ଯାତ୍ରୀ ‘ମୋ ବସ’ରେ ଯାତାୟତ କରିଥିଲେ। ୩୨ଟି ରୁଟରେ ଚଳାଚଳ କରୁଥିବା ୨୨୫ଟି ‘ମୋ ବସ’ରେ ଭୁବନେଶ୍ୱର, କଟକ, କୋଣାର୍କ, ପୁରୀ, ଖୋର୍ଦ୍ଧା ଓ ପିପିଲି ପରି ସହରକୁ ଦୈନିକ ହାରାହାରି ୧.୫ ଲକ୍ଷ ଯାତ୍ରୀ ଯିବାଆସିବା କରିଥିବା କ୍ରୁଟ ପକ୍ଷରୁ କୁହାଯାଇଥିଲା।
କଟକ ସହରକୁ ଗଡ଼ିବ ଆଉ ୩୦ଟି ‘ମୋ ବସ୍’
Share Now: