ନୂଆଦିଲ୍ଲୀ : ଦକ୍ଷିଣ ଚୀନ ସାଗରରେ ଥିବା ବିବାଦୀୟ ସ୍ପ୍ରାଟଲି ଦ୍ବୀପ ନିକଟରେ ଆମେରିକା ନୌସେନାର ଯୁଦ୍ଧଜାହାଜ ପ୍ରବେଶ କରିବା ପରେ ଚୀନ ତାହାକୁ ନେଇ ଆପତ୍ତି ଉଠାଇଛି। ଚୀନର ସାର୍ବଭୌମ ଅଞ୍ଚଳରେ ଏହା ଆମେରିକାର ଅନୁପ୍ରବେଶ ଓ ଏହାକୁ ବରଦାସ୍ତ କରାଯିବ ନାହିଁ ବୋଲି ଚୀନ କହିଛି। ଦକ୍ଷିଣ ଚୀନ ସାଗରରେ ଆମେରିକାର ନୌସେନା ଯୁଦ୍ଧାଭ୍ୟାସ କରୁଥିବାବେଳେ ଚୀନ ତାହାକୁ ବିରୋଧ କରୁଛି। କିନ୍ତୁ ଏହା ଅନ୍ତର୍ଜାତୀୟ ଜଳସୀମାରେ ରହୁଥିବାରୁ ଏପରି କରିବା ବେଆଇନ ନୁହେଁ ବୋଲି ଆମେରିକା କହିଛି। ଆମେରିକା ନୌସେନା ପକ୍ଷରୁ କୁହାଯାଇଛି ଯେ ଜୁଲାଇ ୧୬ରେ ୟୁଏସ ବେନଫୋଲଡ ନିଜର ଦକ୍ଷିଣଚୀନ ସାଗର ସ୍ଥିତ ସ୍ପ୍ରାଟଲି ଦ୍ବୀପ ନିକଟରେ ଅତିକ୍ରମ କରିଥିଲା। ଫ୍ରିଡମ ଅଫ ନାଭିଗେସନ ଓ ଅନ୍ତର୍ଜାତୀୟ ଆଇନକୁ ପାଳନ କରି ଏହା କରାଯାଇଛି। ସୂଚନାଯୋଗ୍ୟ ଯେ, ଦକ୍ଷିଣ ଚୀନ ସାଗରକୁ ନିଜର ଅଞ୍ଚଳ ବୋଲି ଦାବି କରୁଛି ଚୀନ। ଏଣୁ ଏଠାରେ ଥିବା ସ୍ପ୍ରାଟଲି ଓ ପାରାସଲ ଦ୍ବୀପକୁ ନିଜର ବୋଲି କହୁଛି ଚୀନ। କିନ୍ତୁ ଦକ୍ଷିଣ ପୂର୍ବ ଏସିଆର ଅନ୍ୟ ଦେଶ, ଆମେରିକା ଓ ଅଷ୍ଟ୍ରେଲିଆ ଏହା ଅନ୍ତର୍ଜାତୀୟ ଜଳକ୍ଷେତ୍ର ମଧ୍ୟରେ ଆସୁଛି ବୋଲି କହୁଛନ୍ତି। ଅନ୍ତର୍ଜାତୀୟ ଜଳ କ୍ଷେତ୍ର ମଧ୍ୟରେ ଜାହାଜ ଚଳାଇବା ସମସ୍ତଙ୍କ ଅଧିକାର ବୋଲି ଏସବୁ ଦେଶ କହୁଛନ୍ତି।
