ୱାସିଂଟନ୍: ବାଲାକୋଟ୍ ଷ୍ଟ୍ରାଇକ୍ ପରେ ପାକିସ୍ତାନ ଆଣବିକ ଆକ୍ରମଣ ପାଇଁ ପ୍ରସ୍ତୁତି କରୁଥିବା କଥା ଭାରତ ମତେ ସୂଚନା ଦେଇଥିଲା ବୋଲି ଆମେରିକାର ପୂର୍ବତନ ବୈଦେଶିକ ସଚିବ ମାଇକ୍ ପମ୍ପିଓ ଦାବି କରିଛନ୍ତି। ସେ କହିଛନ୍ତି, ୨୦୧୯ ଫେବ୍ରୁଆରି ବାଲାକୋଟ୍ ସର୍ଜିକାଲ୍ ଷ୍ଟ୍ରାଇକ୍ ପରେ ପାକିସ୍ତାନ ଆଣବିକ ଆକ୍ରମଣ ପାଇଁ ପ୍ରସ୍ତୁତି କରୁଥିବା କଥା ଭାରତର ବୈଦେଶିକ ମନ୍ତ୍ରୀ ସୁଷମା ସ୍ୱରାଜ ମତେ ଫୋନ୍ କରି ଜଣାଇଥିଲେ। ଏହାର ମୁକାବିଲା ନିମନ୍ତେ ଭାରତ ମଧ୍ୟ ପ୍ରସ୍ତୁତି କରୁଥିବା କଥା ସେ କହିଥିଲେ। ମଙ୍ଗଳବାର ଦିନ ପ୍ରକାଶିତ ସଦ୍ୟତମ ପୁସ୍ତକ ‘ନେଭର୍ ଗିଭ୍ ଆନ୍ ଇଞ୍ଚ୍: ଫାଇଟିଙ୍ଗ୍ ଫର୍ ଦି ଆମେରିକା ଆଇ ଲଭ୍’ରେ ପମ୍ପିଓ କହିଛନ୍ତି ଯେ, ଫେବ୍ରୁଆରି ୨୭-୨୮ ତାରିଖ ଦିନ ଆମେରିକା-ଉତ୍ତର କୋରିଆ ଶିଖର ବୈଠକ ନିମନ୍ତେ ସେ ହାନୋଇରେ ଥିବା ବେଳେ ଘଟଣାଟି ଘଟିଥିଲା। ଏହି ସଙ୍କଟ ଟାଳିବା ନିମନ୍ତେ ତାଙ୍କ ଟିମ୍ ଉଭୟ ନୂଆଦିଲ୍ଲୀ ଓ ଇସ୍ଲାମାବାଦ ସହିତ ରାତି ସାରା କାମ କରିଥିଲେ।
୨୦୧୯ ଫେବ୍ରୁଆରିରେ ଭାରତ-ପାକିସ୍ତାନ ଶତ୍ରୁତା ସୀମା ଉଲ୍ଲଂଘନ କରି ଆଣବିକ ଯୁଦ୍ଧ ଆଡ଼କୁ ଯାଉଥିବା ପ୍ରସଙ୍ଗରେ ବିଶ୍ୱ କେତେଦୂର ଠିକ୍ ମୁଁ ସେ କଥା ଭାବୁନାହିଁ। ସତ କହିବାକୁ ଗଲେ ମୁଁ ବି ଏହାର ସଠିକ ଉତ୍ତର ଦେଇ ପାରିବି ନାହିଁ। କିନ୍ତୁ, ପରମାଣୁ ଯୁଦ୍ଧ ପରିସ୍ଥିତି ଉପୁଜିଥିବା କଥା ମୁଁ ଜାଣିଛି। ସ୍ୱରାଜଙ୍କଠାରୁ ସୂଚନା ପାଇ ମୁଁ ରାଷ୍ଟ୍ରଦୂତ ଜନ୍ ବଲ୍ଟନ୍ଙ୍କ ସହିତ କାର୍ଯ୍ୟ ଆରମ୍ଭ କଲି। ସେତେବେଳେ ସେ ମୋ ସହିତ ଉକ୍ତ ହୋଟେଲ୍ରେ ଥିଲେ। ତା’ପରେ ମୁଁ ପାକିସ୍ତାନର ସେନାମୁଖ୍ୟ ଜେନେରାଲ୍ କ୍ଵାମାର ଜାବେଦଙ୍କ ସହିତ କଥାବାର୍ତ୍ତା କଲି। ଭାରତ ଯାହା କହିଥିଲା, କହିଲି। ସେ କହିଲେ, ଏ ସବୁ ମିଛ କଥା। କିନ୍ତୁ. ପମ୍ପିଓଙ୍କ ଦାବି ଉପରେ ଭାରତର ବୈଦେଶିକ ମନ୍ତ୍ରାଳୟ ତୁରନ୍ତ କୌଣସି ବିବୃତି ଦେଇନାହିଁ। ସ୍ମରଣଯୋଗ୍ୟ, ୨୦୧୯ ଫେବ୍ରୁଆରିରେ ୪୦ଜଣ ‘ସିଆର୍ପିଏଫ୍’ ଯବାନ ସହିତ ହୋଇଥିବା ପୁଲ୍ୱାମା ଆତଙ୍କବାଦୀ ଆକ୍ରମଣର ପ୍ରତ୍ୟୁତ୍ତର ଦେବାକୁ ଯାଇ ଭାରତୀୟ ଲଢୁଆ ବିମାନ ସବୁ ପାକିସ୍ତାନର ବାଲାକୋଟ୍ରେ ଥିବା ‘ଜୈଶ୍-ଏ-ମହମ୍ମଦ୍’ ଆତଙ୍କବାଦୀ ତାଲିମ ଶିବିର ଉପରେ ସର୍ଜିକାଲ୍ ଷ୍ଟ୍ରାଇକ୍ କରିଥିଲେ।
