ନୂଆଦିଲ୍ଲୀ : ଗୃହଯୁଦ୍ଧଗ୍ରସ୍ତ ସୁଦାନରେ ଫସି ରହିଥିବା ଭାରତୀୟଙ୍କ ସମେତ ଅନ୍ୟ ବିଦେଶୀ ନାଗରିକଙ୍କ ସ୍ଥାନାନ୍ତର ପ୍ରକ୍ରିୟା ତ୍ୱରାନ୍ୱିତ ହୋଇଛି। ଭାରତୀୟଙ୍କ ପ୍ରଥମ ବ୍ୟାଚ୍ ସୁଦାନ ଛାଡ଼ିଛି। ପ୍ରାୟ ୨୭୮ ଜଣ ଯାତ୍ରୀଙ୍କୁ ନେଇ ଭାରତୀୟ ଯୁଦ୍ଧ ଜାହାଜ ଆଇଏନଏସ ସୁମେଧା ସାଉଦିଆରବର ଜେଦ୍ଦା ଅଭିମୁଖେ ଯାତ୍ରା କରିଛି। ଏ ସଂପର୍କରେ କେନ୍ଦ୍ର ବୈଦେଶିକ ମନ୍ତ୍ରାଳୟର ମୁଖପାତ୍ର ଅରିନ୍ଦମ ବାଗଚି ଟୁଇଟ୍ କରି ସୂଚନା ଦେଇଛନ୍ତି। ସୁଦାନରୁ ନିଜ ନାଗରିକଙ୍କୁ ସ୍ଥାନାନ୍ତର କରିବା ପାଇଁ ଭାରତ ସରକାର ଅପରେସନ୍ କାବେରୀ ଆରମ୍ଭ କରିଛନ୍ତି। ଏହି ଅପରେସନ ପାଇଁ ୪ଟି ଦେଶ-ସାଉଦି ଆରବ, ୟୁଏଇ, ଆମେରିକା ଓ ବ୍ରିଟେନର ସହାୟତା ନିଆଯାଉଛି।
ସୁଦାନ ସଂକଟ ସଂପର୍କରେ ପ୍ରଧାନମନ୍ତ୍ରୀ ମୋଦୀ ପୂର୍ବରୁ କହିଥିଲେ ଯେ ଆମର ପ୍ରାଥମିକତା ହେଉଛି ଆମ ଲୋକଙ୍କୁ ସୁରକ୍ଷିତ ଭାବେ ଆଣିବା ଏବଂ ଏହାର ଅଭିଯାନ ଆରମ୍ଭ ହୋଇଛି। ସୁଦାନରେ ଚାଲିଥିବା ଗୃହଯୁଦ୍ଧ ମଧ୍ୟରେ ତିନି ଦିନିଆ ଅସ୍ତ୍ରବିରତି ଘୋଷଣା କରାଯାଇଛି। ସୂଚନାଯୋଗ୍ୟ ଯେ, ସୁଦାନରେ କ୍ଷମତା ଅକ୍ତିଆର ପାଇଁ ସେଠାକାର ସେନା ଓ ଅର୍ଦ୍ଧସାମରିକ ବାହିନୀ ରାପିଡ୍ ସପୋର୍ଟ ଫୋର୍ସ (ଆରଏସଏଫ) ମଧ୍ୟରେ ଲଢେଇ ଚାଲିଛି। ତେବେ ଅନ୍ତର୍ଜାତୀୟ ସମୁଦାୟ, ଜାତିସଂଘର ଅନୁରୋଧ କ୍ରମେ ୩ଦିନିଆ ଅସ୍ତ୍ରବିରତି ଘୋଷଣା କରାଯାଇଛି।
