ଓ୍ବାସିଂଟନ : ୟୁକ୍ରେନ ଯୁଦ୍ଧ ଗତ ପ୍ରାୟ ୬ ମାସରୁ ଅଧିକ ସମୟ ଧରି ଜାରି ରହିଥିବାରୁ ରୁଷର ସାମରିକ ସରଞ୍ଜାମ ଶେଷ ହୋଇଆସୁଥିବା ମନେ ହେଉଛି। ଏଥିପାଇଁ ରୁଷ ନିଜର ମିତ୍ର ଦେଶ ଇରାନ ଓ ଉତ୍ତର-କୋରିଆଠାରୁ କେତେକ ଅସ୍ତ୍ରଶସ୍ତ୍ର କିଣିବା ଆରମ୍ଭ କରିଛି। ନିକଟରେ ରୁଷ ଇରାନଠାରୁ କେତେକ ଲଢୁଆ ଡ୍ରୋନ କିଣିଥିବାବେଳେ ଏବେ ଉତ୍ତରକୋରିଆଠାରୁ ରକେଟ୍ ଓ ଆର୍ଟିଲାରୀ ସେଲ କିଣିବାକୁ ପ୍ରକ୍ରିୟା ଆରମ୍ଭ କରିଛି ବୋଲି ଆମେରିକୀୟ ଗୁଇନ୍ଦା ଏଜେନ୍ସିମାନେ ରିପୋର୍ଟ ଦେଇଛନ୍ତି। ଏସବୁ ଦେଶଙ୍କଠାରୁ ଅସ୍ତ୍ରଶସ୍ତ୍ର କିଣିବା ଦର୍ଶାଉଛି ଯେ ରୁଷ ଏବେ ନିଜର ଗୋଳାବାରୁଦ ଓ ଅନ୍ୟ ଅସ୍ତ୍ରଶସ୍ତ୍ର ତିଆରି କରିବାକୁ ଅଭାବର ସମୁଖୀନ ହେଉଛି। ମୁଖ୍ୟତଃ ଆର୍ଥିକ କଟକଣା ଯୋଗୁଁ ରୁଷ କେତେକ କଞ୍ଚାମାଲ ବାହାରୁ ଆମଦାନୀ କରିପାରୁନାହିଁ। ଏଥିପାଇଁ ଅସ୍ତ୍ରଶସ୍ତ୍ର ଉତ୍ପାଦନ ପ୍ରଭାବିତ ହୋଇଛି ବୋଲି ଆମେରିକୀୟ ଗୁଇନ୍ଦା ରିପୋର୍ଟରେ କୁହାଯାଇଛି। ଆଗକୁ ମଧ୍ୟ ଉତ୍ତରକୋରିଆରୁ ଆଉ କେତେକ ଅସ୍ତ୍ରଶସ୍ତ୍ର କିଣିବାକୁ ରୁଷ ବିଚାର କରୁଛି ବୋଲି ଏହି ରିପୋର୍ଟରେ କୁହାଯାଇଛି। ୟୁକ୍ରେନ ଯୁଦ୍ଧ ଆରମ୍ଭ ପରେ ଆମେରିକା ଓ ୟୁରୋପୀୟ ଦେଶମାନେ ରୁଷ ସହ ସଂପର୍କ ଛିନ୍ନ କରିଥିବାବେଳେ ଇରାନ, ଚୀନ ଓ ଉତ୍ତର କୋରିଆ ମସ୍କୋ ସହିତ ସଂପର୍କକୁ ଆହୁରି ନିବିଡ଼ କରିଛନ୍ତି। ତେବେ ଚୀନଠାରୁ କାହିଁକି ରୁଷ ଅସ୍ତ୍ରଶସ୍ତ୍ର କିଣୁନାହିଁ ତାହା ସନ୍ଦେହ ସୃଷ୍ଟି କରିଛି।
ଇରାନ ଓ ଉତ୍ତରକୋରିଆରୁ ଯୁଦ୍ଧ ସରଞ୍ଜାମ କିଣିବ ରୁଷ : ଆମେରିକୀୟ ଗୁଇନ୍ଦା ରିପୋର୍ଟ
Share Now: