ନୂଆଦିଲ୍ଲୀ: ବିହାରର ମଧେପୁରା ଜିଲ୍ଲା ମୁରଲିଗଞ୍ଜ ଦୁର୍ଗା ମନ୍ଦିର ପରିସରରେ ଗତ ବୁଧବାର ଚାଲିଥିବା ଅଷ୍ଟପ୍ରହରୀ ସମୟରେ ଜଣେ ଭକ୍ତ ଭଗବାନ ଶିବଙ୍କ ବେଶରେ ନିଜକୁ ସଜେଇଥିଲେ। ନକଲି ଶିବ ହୋଇଥିବା ବେଳେ ଗଳାରେ ଏକ ଅସଲି ବିଷଧର ସାପକୁ ଗୁଡ଼ାଇ ହୋଇଥିଲେ। ଦୁଃଖର ବିଷୟ ଯେଉଁ ସାପକୁ ସେ ଲୋକଙ୍କ ମନୋରଞ୍ଜନ ପାଇଁ ଗୁଡ଼ାଇ ହୋଇଥିଲେ ତାହାର ଦଂଶନରେ ତାଙ୍କର ମୃତ୍ୟୁ ହୋଇଯାଇଛି। ମୃତକଙ୍କ ନାମ ମୁକେଶ କୁମାର ଓ ବୟସ ମାତ୍ର ୩୦ବର୍ଷ ହୋଇଥିବା କୁହାଯାଉଛି। ନକଲି ଶିବଙ୍କ ଏଭଳି ମୃତ୍ୟୁକୁ ନେଇ ଗ୍ରାମରେ ଶୋକରଛାୟା ଖେଳି ଯାଇଛି। ମନ୍ଦିର ପରିସରରେ ଅଷ୍ଟପ୍ରହରୀ ସହିତ ନାଚଗୀତ ବି ଚାଲିଥିଲା। ଏତିକି ବେଳେ କେହିଜଣେ ବିନ ଗୀତ ବଜାଇ ଦେଇଥିଲେ। ଶିବଙ୍କ ବେଶରେ ସଜେଇ ହୋଇ ଲୋକଙ୍କ ମନୋରଞ୍ଜନ ପାଇଁ ମୁକେଶ ଗଳାରେ ଗୁଡ଼ାଇ ହୋଇଥିବା ଅସଲି ସାପ ବିନ ଶବ୍ଦ ଶୁଣି ଫଣା ଟେକି ଗର୍ଜନ କରି ଉଠିଥିଲା। ମୁକେଶ ସାପକୁ ଯେତେ ଆୟତ୍ତ କରିବାକୁ ଚେଷ୍ଟା କରିଥିଲେ ବି ସେ ତାଙ୍କୁ ଦଂଶନ କରିଥିଲା।
ଭଞ୍ଜନ ମଣ୍ଡଳୀ ମୁକେଶଙ୍କୁ ଘଟଣାସ୍ଥଳରୁ ଉଦ୍ଧାର କରି ହସ୍ପିଟାଲ ନେବା ବଦଳରେ ଝଡ଼ାଫୁଙ୍କା କରିଥିଲେ। ଏଥିରେ ମୁକେଶଙ୍କ ସ୍ୱାସ୍ଥ୍ୟାବସ୍ଥା ଅଧିକ ବିଗିଡ଼ିବାରୁ ତାଙ୍କୁ ହସ୍ପିଟାଲ ନେଇ ଯାଇଥିଲେ। ଡାକ୍ତର ସେଠାରେ ମୁକେଶଙ୍କୁ ମୃତ ଘୋଷଣା କରିଥିଲେ। ଏହାପରେ ଭଜନ ମଣ୍ଡଳୀ ମୁକେଶଙ୍କ ମୃତଦେହକୁ ସେମିତି ଡାକ୍ତରଖାନାରେ ଛାଡ଼ି ଫେରାର ହୋଇଯାଇଥିଲେ। ପରେ ଡାକ୍ତର ମୁକେଶଙ୍କ ମୃତଦେହ ଦେଖି ପୁଲିସକୁ ଖବର ଦେଇଥିଲେ। ଘଟଣାସ୍ଥଳରେ ପୁଲିସ ପହଞ୍ଚି ମୁକେଶଙ୍କ ପରିବାରଲୋକଙ୍କୁ ଘଟଣା ସମ୍ପର୍କରେ ଜଣାଇଥିଲା।
ସର୍ପ ଦଂଶନରେ ନକଲି ଶିବଙ୍କ ମୃତ୍ୟୁ
Share Now: