ଭୁବନେଶ୍ୱର: କିଛି ଦିନ ତଳେ ଜ୍ୟୋତିରଂଜନ ବେଉରା ଓରଫ୍ ଗୋଲ୍ଡେନ୍ ବାବାର ଏକ ଅଡି କାର୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଜବତ କରିଥିବା ବେଳେ ଆଜି ତା’ର ଏକ ବିଏମ୍ଡବ୍ଲୁ କାର୍କୁ ଜବତ କରିଛି। ଏକ ଘରୋଇ ହସ୍ପିଟାଲ ପାର୍କିଂରୁ ଏହି ଦାମୀ ଗାଡ଼ିକୁ ଜବତ କରାଯାଇଛି। ସୂଚନାଯୋଗ୍ୟ ଯେ ଜ୍ୟୋତିରଂଜନର ଘର କେନ୍ଦୁଝର। ସେ ଏଠାରେ ନୀଳାଦ୍ରିବିହାର ଅଞ୍ଚଳରେ ରହୁଥିଲା। ଦେହସାରା ସେ ସୁନା ଅଳଙ୍କାର ପିନ୍ଧୁଥିବାରୁ ଲୋକେ ତାକୁ ଗୋଲ୍ଡେନ୍ ବାବା ବୋଲି କହୁଥିଲେ। ତେବେ ତା’ ନାଁରେ ୪ଟି ଠକେଇ ମାମଲା ଥିବା ବେଳେ ଦୁଇଟି ମାମଲାର ତଦନ୍ତ କ୍ରାଇମ୍ବ୍ରାଞ୍ଚ କରୁଛି। ଏହାଛଡ଼ା ତା’ ନାଁରେ ୧୯ରୁ ଅଧିକ ଆପରାଧିକ ମାମଲା ମଧ୍ୟ ରହିଛି। ସେ ବଡ଼ବିଲସ୍ଥିତ ଏମ୍ଏସ୍ ନ୍ୟାସନାଲ୍ ଏଣ୍ଟରପ୍ରାଇଜର୍ସ ନାମକ ଖଣି କମ୍ପାନିକୁ ୧୧୦ କୋଟିର ଋଣ କରାଇ ଦେବାକୁ ସଂସ୍ଥା ମାଲିକ ଚରଣଜିତ ସିଂହଙ୍କୁ ପ୍ରତିଶ୍ରୁତି ଦେଇଥିଲା। ଚରଣଜିତ୍ ଏଥିପାଇଁ ତାକୁ କେତୋଟି ଚେକ୍ ଦେଇଥିଲେ। ଏହି ଚେକ୍ ଜାଲିଆତି କରି ବାବା ଦିଲ୍ଲୀରୁ କୋଟି କୋଟି ଟଙ୍କା ଉଠାଇ ନେଇଥିଲା। ଏନେଇ ଚନ୍ଦ୍ରଶେଖରପୁର ଥାନାରେ ଅଭିଯୋଗ ହେବା ପରେ ପୁଲିସ ତାଙ୍କୁ ଗିରଫ କରିଥିଲା। ପରେ ତା’ ନାଁରେ ଲକ୍ଷ୍ମୀସାଗର ଓ ସହିଦନଗର ଥାନାରେ ଠକେଇ ଅଭିଯୋଗ ହୋଇଥିଲା। ପାଖାପାଖି ୬ଜଣଙ୍କଠାରୁ ସେ ସାଢ଼େ ୫ କୋଟି ଟଙ୍କା ଠକିଥିଲା। ୨୦୨୦ ଜାନୁଆରିରେ ତାକୁ ଇଓଡବ୍ଲୁ ଗିରଫ କରିଥିଲା ଏବଂ ପରେ ଜାମିନରେ ଆସି ସେ ଫେରାର୍ ହୋଇଯାଇଥିଲା।
