ନୂଆଦିଲ୍ଲୀ: ଜିଏସଟି ଯୋଗୁଁ ସରକାରଙ୍କ ରାଜସ୍ୱ ଆଦାୟରେ କ୍ରମାଗତ ଉନ୍ନତି ଘଟିଚାଲିଛି। ଜୁଲାଇ ମାସରେ କ୍ରମାଗତ ପଞ୍ଚମ ଥର ପାଇଁ ରାଜସ୍ୱ ଆଦାୟ ୧.୬ ଲକ୍ଷ କୋଟି ଟପିଛି। ଜୁଲାଇରେ ଜିଏସଟି ଆଦାୟ ବାର୍ଷିକ ୧୧ ପ୍ରତିଶତ ବୃଦ୍ଧି ପାଇ ୧,୬୫,୧୦୫ କୋଟି ଟଙ୍କାରେ ପହଞ୍ଚିଛି ବୋଲି ଅର୍ଥ ମନ୍ତ୍ରଣାଳୟ ସୂଚନା ଦେଇଛି। ଜୁନ ୨୦୨୩ରେ ଜିଏସଟି ଆଦାୟ ୧.୬୧ ଲକ୍ଷ କୋଟି ଥିଲା ଓ ଜୁଲାଇ ୨୦୨୨ରେ ୧ ଲକ୍ଷ ୪୫ ହଜାର କୋଟି ଥିଲା। ଜିଏସଟି ବ୍ୟବସ୍ଥା ଲାଗୁ ହେବା ପରେ ଏହା ପଞ୍ଚମ ଥର ପାଇଁ ଜିଏସଟି ଆଦାୟ ୧.୬ ଲକ୍ଷ କୋଟି ଟଙ୍କା ଅତିକ୍ରମ କରିଛି। ଏହି ମାସରେ ଓଡ଼ିଶାରେ ଜିଏସଟି ଆଦାୟ ୧୬ ପ୍ରତିଶତ ବୃଦ୍ଧି ପାଇ ୪୨୪୫ କୋଟି ଟଙ୍କାରେ ପହଞ୍ଚିଛି।
ଜୁଲାଇ ମାସରେ ଆଦାୟ ହୋଇଥିବା ୧.୬୫ ଲକ୍ଷ କୋଟିର ଜିଏସଟି ରାଜସ୍ବ ମଧ୍ୟରୁ ୨୯,୭୭୩ କୋଟି ଟଙ୍କାର କେନ୍ଦ୍ରୀୟ ଜିଏସଟି (ସିଜିଏସଟି), ୩୭,୬୨୩ କୋଟି ଟଙ୍କାର ରାଜ୍ୟ ଜିଏସଟି, ୮୫,୯୩୦ କୋଟି ଟଙ୍କାର ସମନ୍ୱିତ ଜିଏସଟି (ସାମଗ୍ରୀ ଆମଦାନୀ ଉପରେ ଆଦାୟ ହୋଇଥିବା ୪୧,୨୩୯ କୋଟି ଟଙ୍କା କୁ ମିଶାଇ) ଅନ୍ତର୍ଭୁକ୍ତ। ଏହାବ୍ୟତୀତ ସେସ୍ ୧୧,୭୭୯ କୋଟି ଟଙ୍କା (ସାମଗ୍ରୀ ଆମଦାନୀ ବାବଦରେ ଆଦାୟ ହୋଇଥିବା ୮୪୦ କୋଟି ଟଙ୍କା କୁ ମିଶାଇ) ଥିଲା।
