ନୂଆଦିଲ୍ଲୀ : ଭାରତ ଚଳିତ ବର୍ଷ ଜି-୨୦ର ସଭାପତି ଥିବାବେଳେ ଭାରତରେ ଜି-୨୦ର ବିଭିନ୍ନ ସମ୍ମିଳନୀମାନ ଆୟୋଜନ କରାଯାଉଛି। ତେବେ ଚୀନ କେତେକ କ୍ଷେତ୍ରରେ ବାରମ୍ବାର ପ୍ରତିବନ୍ଧକ ସୃଷ୍ଟି କରିବାରେ ଲାଗିଛି। ପୂର୍ବରୁ ଚୀନ କଶ୍ମୀରରେ ହୋଇଥିବା ଜି-୨୦ ବୈଠକକୁ ବର୍ଜନ କରିଥିବାବେଳେ ଏବେ ଆଉ ଏକ ପ୍ରସଙ୍ଗ ଉଠାଇ ଭାରତକୁ ଅପଦସ୍ଥ କରିବାକୁ ଉଦ୍ୟମ କରୁଛି।
ଜି-୨୦ର ଲୋଗୋ ଓ ବିଭିନ୍ନ କାଗଜପତ୍ରରେ ‘ବସୁଧୈବ କୁଟୁମ୍ବକମ୍’ ଉଲ୍ଲେଖ ରହିବାକୁ ବିରୋଧ କରୁଛି ଚୀନ। ଚୀନ ପକ୍ଷରୁ କୁହାଯାଇଛି ଯେ ସଂସ୍କୃତ ଜାତିସଂଘର ୬ଟି ଅଫିସିଆଲ ଭାଷା (ଇଂରାଜୀ, ଫରାସୀ, ଆରବୀ, ମାଣ୍ଡାରିନ, ଋଷୀୟ ଓ ସ୍ପାନିସ୍ ) ମଧ୍ୟରେ ନାହିଁ। ‘ବସୁଧୈବ କୁଟୁମ୍ବକମ୍’ ସଂସ୍କୃତରେ ଥିବାରୁ ତାହାକୁ ଲେଖାଯାଇପାରିବ ନାହିଁ। ଏ ପ୍ରସଙ୍ଗରେ ଭାରତ ପକ୍ଷରୁ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ଦିଆଯାଇନାହିଁ। ତେବେ ଏହି ପ୍ରସଙ୍ଗରେ ଜି-୨୦ର ଅନ୍ୟ ଦେଶମାନେ ଭାରତ ସମର୍ଥନରେ ଛିଡ଼ା ହୋଇଛନ୍ତି। କେତେକ ଦେଶ କହିଛନ୍ତି ଯେ ଜି-୨୦ର ଥିମ୍ ଚୟନ କରିବା ଆୟୋଜକ ଦେଶର ବିଶେଷାଧିକାର ଅନ୍ତର୍ଭୁକ୍ତ। ଏଣୁ ଭାରତ ଏପରି କରିପାରିବ। ଏହା ସତ୍ତ୍ୱେ ଚୀନ ନିଜର ଆପତ୍ତି ଜାରି ରଖିଛି। ଏଠାରେ ଉଲ୍ଲେଖଯୋଗ୍ୟ ଯେ ଏପର୍ଯ୍ୟନ୍ତ ହୋଇଥିବା ସମସ୍ତ ଜି-୨୦ ବୈଠକର ସମାପନ କାଗଜପତ୍ରରେ ବସୁଧୈବ କୁଟୁମ୍ବକମ ବଦଳରେ ଇଂରାଜୀରେ ‘ୱାନ ଆର୍ଥ, ୱାନ ଫାମିଲି, ୱାନ ଫ୍ୟୁଚର’ ଲେଖାଯାଇଛି।
ଜି-୨୦ କାଗଜପତ୍ରରେ ‘ବସୁଧୈବ କୁଟୁମ୍ବକମ୍’ ଲେଖାଯାଇପାରିବନି : ଚୀନ
Share Now: