ମୁମ୍ବାଇ: ଜଣାଶୁଣା ଅନଲାଇନ ଫର୍ଣ୍ଣିଚର କମ୍ପାନୀ ପେପରଫ୍ରାଏର ସହ-ପ୍ରତିଷ୍ଠାତା ଅମ୍ବରିସ ମୁର୍ତ୍ତୀଙ୍କ ଦେହାନ୍ତ ହୋଇଯାଇଛି। ହୃଦ୍ଘାତ ହେତୁ ୫୧ ବର୍ଷୀୟ ଅମ୍ବରିସ ମୁର୍ତ୍ତୀଙ୍କର ଗତକାଲି ରାତିରେ ଲେହରେ ମୃତ୍ୟୁ ହୋଇଯାଇଛି। ପେପରଫ୍ରାଏର ଅନ୍ୟତମ ସହ-ପ୍ରତିଷ୍ଠାତା ଆଶିଷ ସିଂ ଏକ ଟୁଇଟ୍ ମାଧ୍ୟମରେ ଦୁଃଖଦ ଖବର ଦେଇଛନ୍ତି। ସେ ଲେଖିଛନ୍ତି ଯେ ହୃଦଘାତ ହେତୁ ସେ ତାଙ୍କ ବନ୍ଧୁ ତଥା ପରାମର୍ଶଦାତା ଅମ୍ବରିସ ମୁର୍ତ୍ତୀଙ୍କୁ ହରାଇଛନ୍ତି। ୧୯୯୬ରେ ଅମ୍ବରିସ ମୁର୍ତ୍ତୀ ବ୍ୟବସାୟ ଜଗତରେ ପ୍ରବେଶ କରିଥିଲେ। ସେତେବେଳେ ସେ କ୍ୟାଡବରୀ ସହିତ ବିକ୍ରୟ ଏବଂ ମାର୍କେଟିଂ ପ୍ରଫେସନାଲ ଭାବରେ କାମ କରିବା ଆରମ୍ଭ କରିଥିଲେ।
ଅମ୍ବରିସ ମୁର୍ତ୍ତୀ ଏହି କମ୍ପାନୀରେ ସାଢେ ପାଞ୍ଚ ବର୍ଷ କାର୍ଯ୍ୟ କରିଥିଲେ। ଏହାପରେ ସେ ଆଇସିଆଇସିଆଇ ଏଏମସିରେ ମାର୍କେଟିଂ ଏବଂ କଷ୍ଟ୍ୟୁମର ସର୍ଭିସ ଉପାଧ୍ୟକ୍ଷ ଭାବରେ ପ୍ରାୟ ଦୁଇ ବର୍ଷ କାର୍ଯ୍ୟ କରିଥିଲେ ଏବଂ ପରେ ଲେଭିସରେ ପାଞ୍ଚ ମାସ ଧରି କାର୍ଯ୍ୟ କରିଥିଲେ। ମୁର୍ତ୍ତୀ ଜୁନ୍ ୨୦୧୧ରେ ଆଶିଷ ଶାହାଙ୍କ ସହ ପେପରଫ୍ରାଏ ଆରମ୍ଭ କରିଥିଲେ। ବିଶେଷ କରି ପେପରଫ୍ରାଏ ମାଧ୍ୟମରେ ଜଣେ ଗ୍ରାହକ ଅନଲାଇନରେ ଫର୍ଣ୍ଣିଚର ସହ ଘରକରଣା ଜିନିଷ ଅର୍ଡର କରିଥାନ୍ତି। ନୂତନ ଡିଜାଇନର ଘରୋଇ ଉପକରଣ ସାଙ୍ଗକୁ ରିହାତିରେ ଫର୍ଣ୍ଣିଚର ବିକ୍ରି କରିବାରେ ଏହି କମ୍ପାନୀର ନାମ ରହିଛି।
