ନୂଆଦିଲ୍ଲୀ : ମଣିପୁର ହିଂସାକୁ ନେଇ କେନ୍ଦ୍ରର ମୋଦୀ ସରକାରଙ୍କ ବିରୋଧରେ ଆଗତ ଅନାସ୍ଥା ପ୍ରସ୍ତାବ ଉପରେ ଲୋକସଭାରେ ବିତର୍କ ଜାରି ରହିଛି। ଗୁରୁବାର ଅପରାହ୍ନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିରୋଧୀଙ୍କ ଅଭିଯୋଗର ଜବାବ ରଖିଛନ୍ତି। ସେ କହିଛନ୍ତି ଯେ ବିରୋଧୀ ଦଳ ଯେତେବେଳେ ବି ଅନାସ୍ଥା ପ୍ରସ୍ତାବ ଆଣନ୍ତି, ତାହା ତାଙ୍କ (ଏନଡିଏ ସରକାର) ପାଇଁ ଶୁଭ ହୋଇଥାଏ। ବିରୋଧୀ ଦଳଙ୍କୁ ସମାଲୋଚନା କରି ମୋଦୀ କହିଛନ୍ତି ଯେ ଏହି ଦଳ ଗୁଡ଼ିକ ସବୁବେଳେ ଦେଶ ସ୍ୱାର୍ଥ ଅପେକ୍ଷା ଦଳୀୟ ସ୍ୱାର୍ଥକୁ ଗୁରୁତ୍ୱ ଦେଇଆସିଛନ୍ତି। ବିରୋଧୀ ଆମ ପାଇଁ ଫିଲଡିଂ ସଜାଇଥିଲେ, କିନ୍ତୁ ଶାସକ ଦଳ ପକ୍ଷରୁ ଛକା ଚୌକା ସହ ଶତକ ଲଗାଯାଇଛି। ଏଣୁ ବିରୋଧୀ ଦଳ ଟିକିଏ ପ୍ରସ୍ତୁତି କରିଆସିବା ଆବଶ୍ୟକ।
ମୋଦୀ କହିଛନ୍ତି ଯେ ଏଥର ଅନାସ୍ଥା ପ୍ରସ୍ତାବ ଉପରେ ବିତର୍କ ବେଳେ ବିରୋଧୀ ଦଳ ନେତାଙ୍କୁ ଭଲଭାବରେ କହିବାର ସୁଯୋଗ ଦିଆଗଲା ନାହିଁ। ୧୯୯୯ରେ ଅଟଳଜୀଙ୍କ ସରକାର ବିରୋଧରେ ଆଗତ ଅନାସ୍ଥା ପ୍ରସ୍ତାବ ବେଳେ ତତକାଳୀନ ବିରୋଧୀ ଦଳ ନେତା ଶରଦ ପାୱାର, ୨୦୦୩ରେ ଅଟଳଜୀଙ୍କ ସରକାର ବିରୋଧରେ ଆଗତ ଅନାସ୍ଥା ପ୍ରସ୍ତାବ ବେଳେ ତତକାଳୀନ ବିରୋଧୀ ଦଳ ନେତା ସୋନିଆ ଗାନ୍ଧି ଓ ୨୦୧୮ରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେ ନିଜର ପକ୍ଷ ଭଲ ଭାବରେ ରଖିଥିଲେ। କିନ୍ତୁ ଏଥର ତାହା ହୋଇନାହିଁ, ବିରୋଧୀ ଦଳ ନେତା ଅଧୀର ରଞ୍ଜନ ଚୌଧୁରୀଙ୍କୁ ଭଲଭାବେ କହିବାକୁ ସୁଯୋଗ ଦିଆଯାଇନଥିଲା। ସେ ଗଲାଥର ଗର୍ଜୁଥିଲେ, କିନ୍ତୁ ଏଥର ସେ କାହିଁକି ଚୁପ ହୋଇ ବସିଛନ୍ତି ?
ବିରୋଧୀଙ୍କ ଅନାସ୍ଥା ପ୍ରସ୍ତାବ ଆମ ପାଇଁ ଶୁଭ ହୋଇଥାଏ : ମୋଦୀ
Share Now: