ନୂଆଦିଲ୍ଲୀ: ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ପୁଅ ତଥା ରାଜ୍ୟର କ୍ରୀଡ଼ା ଓ ଯୁବବ୍ୟାପାର ମନ୍ତ୍ରୀ ଉଦୟନିଧି ଷ୍ଟାଲିନ ଏବଂ ଡିଏମକେ ସାଂସଦ ଏ. ରାଜାଙ୍କ ବିରୋଧରେ ଗୁରୁବାର ସୁପ୍ରିମକୋର୍ଟରେ ଏକ ପିଟିସନ ଦାଖଲ କରାଯାଇଛି। ଆବେଦନକାରୀ ବିନୀତ ଜିନ୍ଦଲ କହିଛନ୍ତି ଯେ ଉଦୟନିଧି ଷ୍ଟାଲିନ ସନାତନ ଧର୍ମ ଉଚ୍ଛେଦ ପାଇଁ ବୟାନ ଦେଇଥିଲେ, କିନ୍ତୁ ତଥାପି ତାମିଲନାଡୁ ପୁଲିସ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ।
ଆବେଦନକାରୀ ଆହୁରି ମଧ୍ୟ କହିଛନ୍ତି ଯେ ଏହି ମାମଲାରେ ଦିଲ୍ଲୀ ପୁଲିସ ନିକଟରେ ମଧ୍ୟ ଅଭିଯୋଗ କରାଯାଇଛି, କିନ୍ତୁ ଦିଲ୍ଲୀ ପୁଲିସ ଏଫଆଇଆର ରୁଜ୍ଜୁ କରିନାହିଁ। ଏହି କାରଣରୁ ଉଭୟ ତାମିଲନାଡୁ ଏବଂ ଦିଲ୍ଲୀ ପୁଲିସ ସୁପ୍ରିମକୋର୍ଟଙ୍କ ରାୟ ପାଳନ ନ କରି ଅଦାଲତ ଅବମାନନା କରିଛନ୍ତି। ଘୃଣା ସୃଷ୍ଟିକାରୀ ଭାଷଣ ବିରୋଧରେ ସଂପୃକ୍ତ ରାଜ୍ୟର ପୁଲିସ କାର୍ଯ୍ୟାନୁଷ୍ଠାନ କରିବାକୁ ସୁପ୍ରିମକୋର୍ଟ କିଛି ମାସ ତଳେ ନିର୍ଦ୍ଦେଶ ଦେଇଥିଲେ। ଡିଏମକେ ନେତା ଏ ରାଜା କହିଛନ୍ତି ଯେ ସନାତନ ଧର୍ମକୁ ଏଡ୍ସ ସହ ତୁଳନା କରାଯିବା ଉଚିତ, ଯେଉଁଥିରେ ସାମାଜିକ କଳଙ୍କ ଜଡିତ। ଉଦୟନିଧି ଷ୍ଟାଲିନ ଡେଙ୍ଗୁ ଓ ମ୍ୟାଲେରିଆକୁ ତୁଳନା କରି ନମ୍ରତା ଦେଖାଇଛନ୍ତି। ଏହା ପୂର୍ବରୁ ଉଦୟନିଧି ମଧ୍ୟ ସନାତନ ଧର୍ମର ବିଲୋପ ପାଇଁ କହିଥିଲେ। ଏହି ଦୁଇ ବୟାନକୁ ନେଇ ସାରା ଦେଶରେ ବିବାଦ ଦେଖାଦେଇଛି।
ସନାତନ ଧର୍ମ ବିରୋଧୀ ବୟାନ ଉପରେ ଉଦୟନିଧି, ଏ.ରାଜାଙ୍କ ବିରୋଧରେ ସୁପ୍ରିମକୋର୍ଟରେ ମାମଲା
Share Now: