ନୂଆଦିଲ୍ଲୀ: ବିହାରରେ କୁହୁଡ଼ି ପାଇଁ ଲୋକେ ଯାତାୟାତରେ ଅନେକ ଅସୁବିଧାର ସାମ୍ନା କରୁଛନ୍ତି। ଏହି କୁହୁଡ଼ି ପାଇଁ ସଡ଼କ ଦୁର୍ଘଟଣା ବି ଘଟୁଛି। ନିକଟରେ ଭାଗଲପୁର ନବଗଛିଆରେ ଏକ ଭୟାବହ ସଡ଼କ ଦୁର୍ଘଟଣାରେ ତିନିଜଣଙ୍କ ମୃତ୍ୟୁ ହୋଇଯାଇଥିବା ଜଣାପଡ଼ିଛି। ଏହି ମୃତକ ତିନିଜଣସାଙ୍ଗ ଥିବା ଜଣାପଡ଼ିଛି। ସୂଚନାଯୋଗ୍ୟ, ତିନିଜଣ ସାଙ୍ଗ ନବଗଛିଆର ମକନପୁରକୁ ଜଣେ ସାଙ୍ଗଙ୍କ ଜନ୍ମଦିନ ଭୋଜିରେ ସାମିଲ ହେବାକୁ ଯାଇଥିଲେ। ଭୋଜି ସାରି ହସଖୁସିରେ ଏକ ବାଇକ ଯୋଗେ ଘରକୁ ଫେରୁଥିବା ବେଳେ ଏକ ଅଜଣା ଗାଡ଼ି ସହିତ ସେମାନଙ୍କର ଧକ୍କା ହୋଇଥିଲା। ଫଳରେ ଘଟଣାସ୍ଥଳରେ ହିଁ ତିନିଜଣଙ୍କ ପ୍ରାଣବାୟୁ ଉଡ଼ିଯାଇଥିଲା।
ଏହି ଦୁର୍ଘଟଣା ସମ୍ପର୍କରେ ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ତିନିଜଣଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇ ଯାଞ୍ଚ ଆରମ୍ଭ କରିଛି। ମୃତକମାନେ ହେଲେ ପ୍ରିନ୍ସ କୁମାର (୨୩), ସୁକେଶ କୁମାର(୨୦) ଓ ସୁରଜ କୁମାର ଓରଫ ରାହୁଲ (୨୨)। ପ୍ରିନ୍ସଙ୍କ ବିବାହ ୬ବର୍ଷ ପୂର୍ବେ ହୋଇଥିବା ବେଳେ ତାଙ୍କର ଏକ ତିନିବର୍ଷର ପୁଅ ଅଛି। ପୁଲିସ ସୂତ୍ରରୁ ପ୍ରକାଶ, ପ୍ରିନ୍ସ,ସୁକେଶ ଓ ସୁରଜ ତିନିଜଣ ଗୋଟିଏ ବାଇକରେ ବସି ଯାଉଥିବା ବେଳେ ହେଲମେଟ ପିନ୍ଧି ନଥିଲେ। ହେଲମେଟ ପିନ୍ଧିଥିଲେ ହୁଏତ ସେମାନଙ୍କ ଜୀବନ ଆଜି ବଞ୍ଚି ଯାଇଥାଆନ୍ତା। ଦୁର୍ଘଟଣାସ୍ଥଳରୁ ପ୍ରିନ୍ସ କୁମାର, ସୁକେଶ କୁମାର ଓ ସୁରଜ କୁମାରଙ୍କ ଫୋନ ମିଳ ଥିଲା। ଏଥିରୁ ସେମାନଙ୍କ ପରିବାରଲୋକଙ୍କୁ ଯୋଗାଯୋଗ କରି ଦୁର୍ଘଟଣା ବିଷୟରେ ସୂଚନା ଦିଆଯାଇଥିଲା।
