ଚାନ୍ଦବାଲି: ଭଦ୍ରକ ଜିଲ୍ଲାର ଚାନ୍ଦବାଲିରେ ଆଜି ଦେଖିବାକୁ ମିଳିଛି ଏକ ଅଭାବନୀୟ ଦୃଶ୍ୟ। ଗାଁକୁ ଯିବା ପାଇଁ ଭଲ ରାସ୍ତା ନ ଥିବାରୁ ଆମ୍ବୁଲାନ୍ସ ଯିବାକୁ ମନା କରିଥିବା ବେଳେ ଅଧାବାଟରେ ଓହ୍ଲାଇ ଦେଇଥିଲା କାର। ଫଳରେ ପରିବାରର ସମ୍ପର୍କୀୟମାନେ ଖଟିଆରେ ବୋହି ନେଲେ ରୋଗୀକୁ। ଦୀର୍ଘ ଦେଢ଼ କିମି ରାସ୍ତାରେ ଯିବା ପାଇଁ ହାତରେ ମୋବାଇଲ ଲାଇଟ୍ ଥିଲା ଭରସା। ରାସ୍ତାରେ ବଡ଼ବଡ଼ ଖାଲ ସାଙ୍ଗକୁ ବିପଦପୂର୍ଣ୍ଣ ଅବସ୍ଥା। ଘରୋଇ ଗାଡ଼ି ଗାଁ ଭିତରକୁ ପ୍ରବେଶ କରିବାକୁ ମନା କରିଦେବାରୁ ରୋଗୀଙ୍କ ସମ୍ପର୍କୀୟମାନେ ବାଧ୍ୟହୋଇ ରୋଗୀକୁ ଖଟିଆରେ ବୋହି ନେଇଥିଲେ। ଚାନ୍ଦବାଲି ବ୍ଲକ ନଳଗୋହୀରା ପଞ୍ଚାୟତ ବିଲ ନୂଆଗାଁର ୰ ନବଘନ ରାଉତଙ୍କ ପତ୍ନୀ ଶାନ୍ତଲତା ରାଉତ ପକ୍ଷାଘାତରେ ଆକ୍ରାନ୍ତ ହୋଇ ମେଡିକାଲକୁ ଯାଇଥିବା ବେଳେ ଡାକ୍ତର ଘରକୁ ପଠାଇ ଦେଇଥିଲେ। ପରିବାର ଲୋକେ ଆମ୍ବୁଲାନ୍ସକୁ ଡକାଇଥିଲେ, ମାତ୍ର ଗାଁ ରାସ୍ତା ଭଲ ନ ଥିବାରୁ ଯିବାକୁ ଆମ୍ବୁଲାନ୍ସ ଚାଳକ ମନା କରିଦେଇଥିଲେ। ଫଳରେ ପରିବାର ଲୋକେ ଘରୋଇ ଗାଡ଼ିକୁ ଡ଼କାଇ ଆଣିଥିଲେ । ହେଲେ ଗାଁ ମୁଣ୍ଡ ରାସ୍ତାର ଅଧାବାଟରେ ଗାଡ଼ି ଆଉ ଗାଁ ଭିତରକୁ ଯାଇପାରି ନଥିଲା। ଫଳରେ ପରିବାର ଲୋକେ ଖଟିଆରେ ବୋହି ନେଇଥିଲେ। ରୋଗୀଙ୍କୁ ବୋହି ନେଉଥିବା ବେଳେ ସମ୍ପର୍କୀୟମାନେ କାନ୍ଦୁଥିବାର ଦେଖିବାକୁ ମିଳିଥିଲା।
