ସ୍ଥାନୀୟ ପଞ୍ଚାୟତ ପ୍ରଶାସନ ଦୃଷ୍ଟି ଦେବେ କି…?
ଧରାକୋଟ: ଧରାକୋଟ ଗଡଜାତ ଅଞ୍ଚଳର ଆରାଧ୍ୟ ଦେବତା ଭାବରେ ଦୀର୍ଘ ୩୦୦ବର୍ଷରୁ ଅଧିକ ହେବ ପୂଜାପାଇ ଆସୁଛନ୍ତି ମହାପ୍ରଭୁ ଶ୍ରୀ ଶ୍ରୀ ଜଗନ୍ନାଥ। ଧରାକୋଟ ରାଜପରିବାରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ମନ୍ଦିରର ସମସ୍ତ ନୀତିକାନ୍ତି ହୋଇଆସୁଛି।ଧରାକୋଟ ସହରର ମୁଖ୍ୟ ସ୍ଥାନରେ ମନ୍ଦିରଟି ଥିବାରୁ ପ୍ରତିଦିନ ଭକ୍ତ ଓ ସ୍ଥାନୀୟ ଲୋକଙ୍କର ଚଳପ୍ରଚଳ ସେହି ଅଞ୍ଚଳରେ ହୋଇଥାଏ। ଏହି ଅଞ୍ଚଳର ରାସ୍ତାଘାଟ ,ବିଜୁଳି ଆଲୋକ ଓ ପରିମଳର ବ୍ୟବସ୍ଥା ସ୍ଥାନୀୟ ପଞ୍ଚାୟତ ବୁଝିଥାଏ। କିନ୍ତୁ ଦୁଃଖ ଓ ପରିତାପର ବିଷୟ ଏହି ଯେ ମନ୍ଦିରର ଚତୁପାର୍ଶ୍ବରୁ କିଛି ସ୍ଥାନ ଲୋକମାନଙ୍କର କବଜାରେ ରହିଥିବାବେଳେ ପରିମଳ ବ୍ୟବସ୍ଥା ସମ୍ପୂର୍ଣ୍ଣ ଠପ ଥିଲାପରି ଲାଗୁଛି। କିଛି ଲୋକ କେବିନ ପକାଇ ଅବରୋଧ କରି ରଖିଥିବାବେଳେ ସ୍ଥାନୀୟ ବଜାରର ସମସ୍ତ ଆବର୍ଜନାକୁ ମନ୍ଦିର ପାଚେରୀ କଡରେ ପକାଇ ମନ୍ଦିର ପରିବେଶକୁ ପୂତିଗନ୍ଧମୟ କରିଦେଉଛନ୍ତି। ଦୀର୍ଘଦିନ ଧରି ଅଳିଆ ପଡୁଥିଲେ ମଧ୍ୟ ସ୍ଥାନୀୟ ପ୍ରଶାସନ ପକ୍ଷରୁ କୌଣସି ବ୍ୟବସ୍ଥା କରାଯାଉନାହିଁ। ବର୍ତ୍ତମାନ ମହାମାରୀ କରୋନା ସମୟରେ ସମସ୍ତ ଅଞ୍ଚଳକୁ ପରିଷ୍କାର କରାଯାଇ ବିଶୋଧନ କରାଯିବାର ଆବଶ୍ୟକତା ରହିଛି। ତେଣୁ ବିଡ଼ିଓ,ତହସିଲଦାର ଓ ସ୍ଥାନୀୟ ଥାନା ଅଧିକାରୀ ଏଥିପ୍ରତି ଦୃଷ୍ଟିଦେବାକୁ ସାଧାରଣରେ ଅନୁରୋଧ କରାଯାଉଛି।
