ତଥ୍ୟ ଲୁଚାଉଛନ୍ତି ଦିଦି
ନୂଆଦିଲ୍ଲୀ : ପଶ୍ଚିମ ବଙ୍ଗରେ କରୋନା ଜନିତ ମୃତ୍ୟୁହାର ୧୨.୮ ପ୍ରତିଶତ ଯାହାକି ଦେଶରେ ସର୍ବାଧିକ ରହିଛି ବୋଲି କେନ୍ଦ୍ରୀୟ ଟିମ ରିପୋର୍ଟ ଦେଇଛି। ପଶ୍ଚିମବଙ୍ଗରେ ପ୍ରାୟ ଦୁଇ ସପ୍ତାହ ରହି ସ୍ଥିତି ପର୍ଯ୍ୟବେକ୍ଷଣ କରିବା ପରେ କେନ୍ଦ୍ରୀୟ ଟିମ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଓ ପଶ୍ଚିମବଙ୍ଗ ମୁଖ୍ୟ ଶାସନ ସଚିବଙ୍କୁ ରିପୋର୍ଟ ଦେଇଛନ୍ତି। ଏହି ରିପୋର୍ଟରେ କୁହାଯାଇଛି ଯେ ରାଜ୍ୟରେ କେନ୍ଦ୍ରୀୟ ଟିମକୁ ପଶ୍ଚିମବଙ୍ଗ ସରକାର କୌଣସି ସହଯୋଗ କରିନାହାନ୍ତି। ଏପରିକି କୌଣସି ପ୍ରଭାବିତ ଅଞ୍ଚଳକୁ ପରିଦର୍ଶନ କରିବାକୁ ରାଜ୍ୟ ସରକାର ସହାୟତା କରିନଥିଲେ ବୋଲି କମିଟି ଅଭିଯୋଗ କରିଛି। ଟିମ ପକ୍ଷରୁ ରିପୋର୍ଟରେ କୁହାଯାଇଛି ଯେ ପଶ୍ଚିମବଙ୍ଗ ସରକାରଙ୍କ ତରଫରୁ ନିଜର ମେଡିକାଲ ବୁଲେଟିନ ଓ କେନ୍ଦ୍ର ସରକାରଙ୍କୁ ଦିଆଯାଉଥିବା କରୋନା ସଂପର୍କିତ ତଥ୍ୟ ବାସ୍ତବିକତା ସହ ମେଳ ଖାଉନାହିଁ। କେନ୍ଦ୍ରୀୟ କମିଟିର ମୁଖ୍ୟ ଅପୂର୍ବ ଚନ୍ଦ୍ର ନିଜ ପତ୍ରରେ ପଶ୍ଚିମବଙ୍ଗ ମୁଖ୍ୟ ସଚିବ ରାଜୀବ ସିହ୍ନାଙ୍କୁ କହିଛନ୍ତି ଯେ ରାଜ୍ୟର ଅତ୍ୟଧିକ ମୃତ୍ୟୁହାର ସ୍ୱଳ୍ପ ଟେଷ୍ଟିଂ, ସତର୍କତା ଓ ଉପଯୁକ୍ତ ପଦକ୍ଷେପର ଅଭାବ ଯୋଗୁଁ ହେଉଛି।
