ଧଉଳି : ଲଗାଣ ବର୍ଷାରେ ଭୁବନେଶ୍ବର ବ୍ଲକ ଅଧୀନ ଶିଶୁପାଳଗଡ଼ ଗ୍ରାମ ମଙ୍ଗଳା ସାହିର ଗୁନ କାଣ୍ଡି ପ୍ରଭାବିତ ହୋଇଛନ୍ତି। ତାଙ୍କର ୩ ବଖରା କଚ୍ଚାଘର ସଂପୂର୍ଣ୍ଣ ଭୁଶୁଡ଼ି ପଡ଼ିଛି।ଗୁନଙ୍କର ଦୁଇବଖରା ଚଳଣି ମାଟିଘର ସହିତ ଆଉ ବଖରାଏ ଗୁହାଳ ଭାଙ୍ଗିଯାଇଛି। ବର୍ଷାରେ ଭିଜିଯାଇଥିବା ଗୁହାଳ ଘର ମାଟିକାନ୍ଥ ଆଜି ଭୋର ସମୟରେ ହଠାତ ଭୁଶୁଡ଼ି ପଡ଼ିବାରୁ ଦୁଇଟି ଛେଳିଙ୍କର ମୃତ୍ୟୁ ହୋଇଯାଇଥିବା ବେଳେ ଆଉ ଦୁଇଟି ଛେଳି ଗୁରୁତର ଆହତ ହୋଇଛନ୍ତି।ଖବର ପାଇ ଶିଶୁପାଳଗଡ଼ ସରପଞ୍ଚ ଇତିଶ୍ରୀ ଚମ୍ପତ୍ତି ଘଟଣାସ୍ଥଳରେ ପହଞ୍ଚି ଏହାର ତଦନ୍ତ କରିଥିଲେ। ଅନ୍ୟପକ୍ଷରେ କାନ୍ଥ ଭୁଶୁଡ଼ିପଡ଼ିବା ଆଶଙ୍କାରେ ପଡ଼ୋଶୀ ଘରେ ରହୁଥିବା ଗୁନ ଏହି ଅଘଟଣରୁ ଅଳ୍ପକେ ରକ୍ଷା ପାଇଯାଇଥିଲେ।ସୂଚନା ଅନୁଯାୟୀ ଗୁନ ଜଣେ ଦାରିଦ୍ର୍ୟ ସୀମାରେଖା ତଳେଥିବା ମହିଳା ଏବଂ ସେ ଛେଳି ଚରାଇ ପରିବାର ପ୍ରତିପୋଷଣ କରନ୍ତି। ହେଲେ ତାଙ୍କୁ ଏଯାଏ ସରକାରଙ୍କ ପକ୍କାଘର ଯୋଜନାରେ ଅନ୍ତର୍ଭୁକ୍ତ କରାଯାଇ ନାହିଁ। ବ୍ଲକ ଏବଂ ପଞ୍ଚାୟତ ଜନପ୍ରତିନିଧି ଏଦିଗରେ ସ୍ବତନ୍ତ୍ର ଦୃଷ୍ଟି ଦେବାକୁ ଦାବି ହେଉଛି।
