ଭୁବନେଶ୍ୱର: ବିଶ୍ୱକପ୍ ପାଇଁ ସ୍ଵେଚ୍ଛାସେବୀ ଦାଇତ୍ୱରେ ଥିବା କିଛି ଉଦୀୟମାନ କ୍ରୀଡ଼ା ତାରକା ଶନିବାର ଢେର ପ୍ରଶଂସା ସାଉଣ୍ଟିଥିଲେ। ଏମାନଙ୍କ ଅକ୍ଳାନ୍ତ ପରିଶ୍ରମ ପାଇଁ କାନାଡା ଓ ଚିଲି ମଧ୍ୟରେ ଖେଳାଯାଇଥିବା ଦ୍ବିତୀୟ ମ୍ୟାଚ୍ ସୁରୁଖୁରୁରେ ଶେଷ ହୋଇଥିଲା। ବାତ୍ୟା ଜୱାଦ ପ୍ରଭାବରେ ଶନିବାର ସକାଳ ପାଗ ପୂରା କୋହଲା ରହିଥିଲା। ଝିପିଝିପି ବର୍ଷା ସତ୍ତ୍ୱେ ଆମେରିକା ଓ କାନାଡା ମଧ୍ୟରେ ଖେଳାଯାଇଥିବା ପ୍ରଥମ ମ୍ୟାଚ୍ ବେଳେ ବିଶେଷ ଅସୁବିଧା ହୋଇ ନଥିଲା। ହେଲେ କାନାଡା-ଚିଲି ମ୍ୟାଚ୍ ପୂର୍ବରୁ ଢୁଢୁ ବର୍ଷା ହେବା ସହ କଳିଙ୍ଗ ଷ୍ଟାଡିୟମ୍ ନୀଳ ଟର୍ଫରେ ପାଦେ ପର୍ଯ୍ୟନ୍ତ ପାଣି ଜମି ଯାଇଥିଲା। ଜଳ ନିଷ୍କାସନର ଭଲ ବ୍ୟବସ୍ଥା ଥିଲେ ମଧ୍ୟ ଟର୍ଫରୁ ପାଣି ପୂରା ଖାଲି ହୋଇନଥିଲା। ଏତିକିବେଳେ ସ୍ଵେଚ୍ଛାସେବୀମାନେ ହାତରେ ୱାଇପର୍ ଧରି ବାହାରି ପଡ଼ିଥିଲେ। ଏମୁଣ୍ଡରୁ ସେମୁଣ୍ଡ ପର୍ଯ୍ୟନ୍ତ ପାଣି ସଫା କରି ଟର୍ଫକୁ କିଛି କ୍ଷଣ ଭିତରେ ଖେଳିବା ଉପଯୋଗୀ କରି ଅଜସ୍ର ପ୍ରଶଂସା ସାଉଣ୍ଟିଥିଲେ।
Share Now:
