ଲଣ୍ଡନ : ଭାରତରେ ଗ୍ରୀଷ୍ମପ୍ରବାହ ଏକ ସାଧାରଣ କଥା। କିନ୍ତୁ ଇଂଲଣ୍ଡରେ ? ଆଶ୍ଚର୍ୟ୍ୟ ମନେହେଲେ ବି ସତ। ଇଂଲଣ୍ଡରେ ଏବର୍ଷ ଏପରି ଗ୍ରୀଷ୍ମ ପ୍ରବାହ ଅନୁଭୂତ ହେଉଛି, ଯାହାକି ପୂର୍ବରୁ କେବେ ହୋଇନଥିଲା। ଲଣ୍ଡନ ସମେତ ଇଂଲଣ୍ଡର କେତେକ ସ୍ଥାନରେ ପାରା ୪୦ ଡିଗ୍ରୀ ଟପିଯାଇଛି। ପ୍ରବଳ ଗରମ ସହ ଅଭ୍ୟସ୍ତ ନଥିବା ଇଂଲଣ୍ଡବାସୀ ଏହି ଗ୍ରୀଷ୍ମପ୍ରବାହ ଯୋଗୁଁ ଅସ୍ତବ୍ୟସ୍ତ ହୋଇଗଲେଣି। ଇଂଲଣ୍ଡର ବକିମହାମ୍ ପ୍ୟାଲେସ ବାହାରେ ମୁତୟନ ଥିବା କ୍ବିନ୍ସ ଗାର୍ଡ (ରାଣୀଙ୍କ ସୁରକ୍ଷାକର୍ମୀ)ଙ୍କୁ ଜଣେ ବ୍ୟକ୍ତି ପାଣି ପିଆଉଥିବାର ଏକ ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି। ପ୍ରବଳ ଗ୍ରୀଷ୍ମପ୍ରବାହ ଯୋଗୁଁ ଇଂଲଣ୍ଡରେ କେତେକ ସ୍କୁଲକୁ ଛୁଟି ଘୋଷଣା କରାଯାଇଛି। କେତେକ ରେଳ ସେବା ବାତିଲ କରାଯାଇଛି। କେବଳ ଇଂଲଣ୍ଡ ନୁହେଁ, ପଶ୍ଚିମ ଓ ଦକ୍ଷିଣ ୟୁରୋପର ଦେଶଗୁଡ଼ିକରେ ଏବର୍ଷ ପ୍ରବଳ ଗ୍ରୀଷ୍ମପ୍ରବାହ ଅନୁଭୂତ ହେଉଛି। ପ୍ରବଳ ଗରମ ଯୋଗୁଁ କେବଳ ପର୍ତ୍ତୁଗାଲ ଓ ସ୍ପେନରେ ୧୦୦୦ରୁ ଅଧିକ ଲୋକ ମୃତ୍ୟୁବରଣ କରିସାରିଲେଣି। ଫ୍ରାନ୍ସର ଜଙ୍ଗଲରେ ନିଆଁ ଲାଗୁଥିବାରୁ ସେଠାକାର ସରକାର ପ୍ରାୟ ୧୬ ହଜାର ଲୋକଙ୍କୁ ନିରାପଦ ସ୍ଥାନକୁ ନେଇଛନ୍ତି। ସ୍ପେନର ମିଜାସ ହିଲରେ ନିଆଁ ଲାଗିବାରୁ ୩୨୦୦ ଲୋକ ସୁରକ୍ଷିତ ସ୍ଥାନକୁ ପଳାଇଯାଇଛନ୍ତି। କେବଳ ସ୍ପେନ ବା ଫ୍ରାନ୍ସ ନୁହେଁ, ଗ୍ରୀସ ଓ କ୍ରୋଏସିଆର ଜଙ୍ଗଲରେ ବି ନିଆଁ ଲାଗିଛି। ଜଳବାୟୁ ପରିବର୍ତ୍ତନ ଯୋଗୁଁ ଏପରି ହେଉଥିବା କୁହାଯାଉଛି।
