ମସ୍କୋ : ୟୁକ୍ରେନ ସହ ଯୁଦ୍ଧ କରୁଥିବା ରୁଷକୁ ଆଉ ଏକ ଚିନ୍ତା ଘାରିବାରେ ଲାଗିଛି। ତାହା ହେଉଛି ଭାରତକୁ ନାଟୋରେ ସାମିଲ କରିବାକୁ ଆମେରିକାର ଉଦ୍ୟମ। ଚୀନ ଓ ରୁଷକୁ ଘେରିବାକୁ ଆମେରିକା ଏହି ନୂଆ ଚକ୍ରାନ୍ତ କରୁଛି ବୋଲି ରୁଷର ବୈଦେଶିକ ମନ୍ତ୍ରୀ ସର୍ଗେଇ ଲାଭରୋଭ କହିଛନ୍ତି। ଚଳିତ ୟୁକ୍ରେନ ଯୁଦ୍ଧରେ ରୁଷ ସମଗ୍ର ବିଶ୍ବରେ ଏକୁଟିଆ ହୋଇଯାଇଥିବାବେଳେ ପ୍ରକୃତ ବନ୍ଧୁ ଭାବେ ଭାରତ ହିଁ ରୁଷ ପଛରେ ଛିଡ଼ା ହୋଇଛି। ଏହା ଆମେରିକାକୁ ବିବ୍ରତ କରିଛି। ଏଣୁ ଚୀନକୁ ନେଇ ଚିନ୍ତିତ ଥିବା ଭାରତକୁ ଯଦି ନାଟୋରେ ସାମିଲ କରିଦିଆଯାଏ, ତେବେ ରୁଷ ନିଜର ସବୁଠାରୁ ବଡ଼ ବନ୍ଧୁକୁ ହରାଇବାର ଆଶଙ୍କା ରହିଛି। ଏହା ହିଁ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ସବୁଠାରୁ ଅଧିକ ବିବ୍ରତ କରିଚାଲିଛି। ରୁଷ ବୈଦେଶିକ ମନ୍ତ୍ରୀ ଲୋଭରୋଭ କହିଛନ୍ତି ଯେ ଦକ୍ଷିଣ ଚୀନ ସାଗରରେ ନାଟୋ ଏବେ ସକ୍ରିୟ ହୋଇଉଠିଛି। ଚୀନକୁ ଟାର୍ଗେଟ କରିବାକୁ ଏହା କରାଯାଉଛି। କିନ୍ତୁ ନାଟୋର ଏହି ଉଦ୍ୟମ ନିଆଁ ସହ ଖେଳିବା ଭଳି। ଭାରତକୁ ରୁଷ ବିରୋଧୀ ଓ ଚୀନ ବିରୋଧୀ ମେଣ୍ଟରେ ସାମିଲ କରିବାକୁ ଆମେରିକା ଉଦ୍ୟମ କରିଚାଲିଛି। ଏହି କାରଣରୁ ରୁଷ ଚୀନ ସହିତ ଘନିଷ୍ଠ ସାମରିକ ସଂପର୍କ ରଖିଛି ଓ ନିୟମିତ ଭାବେ ଯୁଦ୍ଧାଭ୍ୟାସ କରୁଛି ବୋଲି ସେ କହିଛନ୍ତି।
