ତେହେରାନ : ବ୍ରିଟିଶ ସରକାରଙ୍କ ପାଇଁ ଗୁପ୍ତଚର କାମ କରୁଥିବା ଅଭିଯୋଗରେ ବ୍ରିଟିଶ-ଇରାନୀୟ ନାଗରିକ ଅଲିରେଜା ଆକବରିଙ୍କୁ ଫାଶୀ ଦେଇଛି ଇରାନ। ତାଙ୍କୁ ଆଜି (ଶନିବାର) ସକାଳେ ଫାଶୀ ଦିଆଯାଇଛି ବୋଲି ଇରାନ ନ୍ୟାୟପାଳିକା ସଂପର୍କରେ ଖବର ପରିବେଷଣ କରୁଥିବା ମିଜାନ ନ୍ୟୁଜ୍ ଏଜେନ୍ସି ସୂଚନା ଦେଇଛି। ଏହି ରିପୋର୍ଟ ଅନୁସାରେ ବ୍ରିଟିଶ ଗୁଇନ୍ଦା ଏଜେନ୍ସି ଏମଆଇ-୧୭ ପାଇଁ ଗୁପ୍ତଚର ଭାବେ କାମ କରୁଥିଲେ ବୋଲି ତାଙ୍କ ଉପରେ ଯେଉଁ ଅଭିଯୋଗ ଲଗାଯାଇଥିଲା କୋର୍ଟରେ ତାହା ସାବ୍ୟସ୍ତ ହୋଇଥିଲା। ଏହା ପରେ ତାଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା। ଶୁକ୍ରବାରଦିନ ବ୍ରିଟେନର ବୈଦେଶିକ ସଚିବ ଜେମ୍ସ କ୍ଲେଭର୍ଲି କହିଥିଲେ ଯେ ଆକବରିଙ୍କ ବିରୋଧରେ ଲଗାଯାଇଥିବା ଅଭିଯୋଗ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଓ ସେ ଆଶଙ୍କା କରିଥିଲେ ଯେ ତାଙ୍କୁ ଫାଶୀ ଦିଆଯାଇପାରେ। ଏହି ଆଶଙ୍କାର ଦିନକ ପରେ ତାଙ୍କୁ ଫାଶୀ ଦିଆଯାଇଥିଲା। ଇରାନର ସୁରକ୍ଷା ବିପନ୍ନ ହେବା ପରି କାମ କରିଥିବା ଅଭିଯୋଗ ଆକବରିଙ୍କ ବିରୋଧରେ ଲଗାଯାଇଥିଲା ଓ ଏଥିପାଇଁ ବିପୁଳ ପରିମାଣରେ ଅର୍ଥ ପାଇଥିବା ଅଭିଯୋଗ ହୋଇଥିଲା। ତାଙ୍କ ସୂଚନା ଅଧାରରେ ଇସ୍ରାଏଲର ଗୁଇନ୍ଦା ଏଜେନ୍ସି ମୋସାଦ୍ ଇରାନର ପରମାଣୁ ବିଜ୍ଞାନୀ ମହୋସିନ ଫକ୍ରିଜାଦେଙ୍କୁ ହତ୍ୟା କରିଥିଲା। ତେବେ ଆକବରିଙ୍କ ପରିବାର ଲୋକ ଏହି ଅଭିଯୋଗକୁ ଖଣ୍ଡନ କରିଛନ୍ତି।
