ଜୟପୁର : ରାଜସ୍ଥାନର କିଛି ଅଞ୍ଚଳରେ ମଧ୍ୟ ସାମୁଦ୍ରିକ ଝଡ଼ ‘ବିପର୍ଯ୍ୟୟ’ର ପ୍ରଭାବ ଦେଖିବାକୁ ମିଳୁଛି। ଜାଲୋର ଓ ବାରମେର ଜିଲ୍ଲାର ଅନେକ ସ୍ଥାନରେ ପ୍ରବଳ ବର୍ଷା ହୋଇଛି। ରାଜସ୍ଥାନ ପାଣିପାଗ ବିଭାଗ ନିର୍ଦ୍ଦେଶକ ରାଧେଶ୍ୟାମ ଶର୍ମା କହିଛନ୍ତି ଯେ ଗୁରୁବାର ରାତିରେ କେତେକ ସ୍ଥାନରେ ୬୦-୭୦ ମିଲିମିଟର ବର୍ଷା ହୋଇଛି ଏବଂ ଆଜି ମଧ୍ୟ ଏହି ଦୁଇ ଜିଲ୍ଲା ଏବଂ ଏହାର ଆଖପାଖ ଅଞ୍ଚଳରେ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ଆସନ୍ତା ୪୮ ଘଣ୍ଟା ମଧ୍ୟରେ ଦକ୍ଷିଣ-ପଶ୍ଚିମ ରାଜସ୍ଥାନର ବାରମେର, ପାଲି, ସିରୋହି ଏବଂ ଜାଲୋର ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଏଥିପାଇଁ ଏସବୁ ଜିଲ୍ଲାଗୁଡ଼ିକରେ ରେଡଆଲର୍ଟ ଜାରି କରାଯାଇଛି। ଏହି ବାତ୍ୟା ଏବେ ଦୁର୍ବଳ ହୋଇ ଏକ ଲଘୁଚାପରେ ପରିଣତ ହୋଇଛି ଓ ଏହାର ପ୍ରଭାବରେ ରାଜସ୍ଥାନର ଜୟସେଲମେର, ଆଜମେର ଓ ଉଦୟପୁରରେ ପ୍ରବଳ ବର୍ଷା ହୋଇପାରେ। ବାଡ଼ମେରରେ ବର୍ତ୍ତମାନ ସୁଦ୍ଧା ୭୦ ମିଲିମିଟର ବର୍ଷା ହୋଇଛି। ରାଧେଶ୍ୟାମ ଶର୍ମା କହିଛନ୍ତି, ରାଜସ୍ଥାନର କେତେକ ସ୍ଥାନରେ ଜଳବନ୍ଦୀ ଓ ଆକସ୍ମିକ ବନ୍ୟା ଆଶଙ୍କା ରହିଛି। ପବନର ବେଗ ଘଣ୍ଟା ପ୍ରତି ୫୦ରୁ ୬୦ କିଲୋମିଟର ରହିବ। ରାଜସ୍ଥାନରେ ଆସନ୍ତା ୪୮ ଘଣ୍ଟା ମଧ୍ୟରେ ବର୍ଷା ୨୦୦ ମିଲିମିଟର ଅତିକ୍ରମ କରିପାରେ। ସମଗ୍ର ବର୍ଷା ଋତୁରେ ପଶ୍ଚିମ ରାଜସ୍ଥାନରେ ଯେତିକି ପରିମାଣର ବର୍ଷା ହୁଏ, ଏହା ସେତିକି।
