ଭୁବନେଶ୍ବର: ରାଜଧାନୀ ଭୁବନେଶ୍ବରରେ ପୋଷ୍ଟର ଲଢ଼େଇ ଚାଲିଛି। ଏଣେ ବିଜେପି ଓ ବିଜେଡି ମଧ୍ୟରେ ଛକାପଞ୍ଛା ଚାଲିଛି। ଦୁଇ ମାସ ଆଗରୁ ଭୁବନେଶ୍ଵର ସାଂସଦଙ୍କ ସମର୍ଥକମାନେ କାନ୍ଥ ବାଡ଼ରେ ‘ଏଥର ପୁଣି ଅପରାଜିତା’ ଲେଖି ଏକପ୍ରକାର ପ୍ରଚାର ଆରମ୍ଭ କରି ଦେଇଥିଲେ। ଆଉ ଏବେ ଶାସକ ବିଜେଡି ଦଳ ମଧ୍ୟ କାନ୍ଥ ରାଜନୀତିକୁ ଓହ୍ଲାଇଛି। ସହରର ବିଭିନ୍ନ ସ୍ଥାନରେ ବିଜେଡି କର୍ମୀମାନେ ‘ଶଙ୍ଖ ବିକାଶର ଚିହ୍ନ ଓ ଆମ ଚିହ୍ନ ‘ଶଙ୍ଖ’ ଆଦି ସ୍ଲୋଗାନ ଲେଖିଥିବା ଦେଖିବାକୁ ମିଳୁଛି।
ଏମିତି କି ସାଂସଦ ଲେଖିଥିବା ପୋଷ୍ଟରକୁ ଜାଣିଶୁଣି ବିଜେଡି ଲିଭାଇ ଦେଉଥିବା ଅଭିଯୋଗ ଆଣିଛି ବିଜେପି। ବିଜେପି ମୁଖପାତ୍ର ଦିଲୀପ ମଲ୍ଲିକ କହିଛନ୍ତି, ବିଜେଡି ବର୍ତ୍ତମାନ ବିଜେପି ଓ ଭୁବନେଶ୍ୱର ସାଂସଦଙ୍କୁ ଦେଖି ଭୟଭୀତ ହୋଇଯାଇଛି। ଫଳରେ ପ୍ରଶାସନିକ କଳ ବଳ ଲଗାଇ ଦେଇଛି। ଯେଉଁଠି ବିଜେପିର ପୋଷ୍ଟର ଲିଭାଯାଉଛି କିମ୍ବା ଫାଡା ଯାଉଛି, ସେଠାରେ ବିଜେପିର ଭୋଟ ବଢ଼ୁଛି। ଆଗାମୀ ଦିନରେ ଭୁବନେଶ୍ୱରବାସୀ ଓ ରାଜ୍ୟବାସୀ ଏହାର ଜବାବ ଦେବେ। ସେପଟେ ବିଜେପି ଅଭିଯୋଗର କଡା ଜବାବ ଦେଇଛି ଶାସକ ଦଳ। ବିଧାୟକ ଅନନ୍ତ ନାରାୟଣ ଜେନା କହିଛନ୍ତି, ବିଜେଡି ସବୁ ବେଳେ ଲୋକଙ୍କ ମନ ଜିତିବାରେ ବିଶ୍ୱାସ କରେ। ଏହା ହିଁ ପ୍ରକୃତ ଲଢ଼େଇ। ଆମେ ପୋଷ୍ଟର ଲଢ଼େଇରେ ବିଶ୍ୱାସ ରଖୁ ନାହିଁ। କାହା ପୋଷ୍ଟର ଉପରେ ପୋଷ୍ଟର ମାରିବା, ଲେଖାକୁ ଲିଭାଇବା ଆମ କାମ ନୁହେଁ। ଆମେ ଲୋକଙ୍କ ସହ ରହିଛୁ, ରହିବୁ। ଆମ ଦଳର ନେତା ଯାହା ଶିଖାଇଛନ୍ତି, ଆମେ ସେହି ଅନୁସାରେ କାମ କରୁ। ବିଜେପିର ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ।
ରାଜଧାନୀରେ ପୋଷ୍ଟର ଲଢ଼େଇ : ବିଜେପିର ପୋଷ୍ଟର ଲିଭାଯାଉଛି, ଜବାବ ରଖିଲା ବିଜେଡି
Share Now: