ଲଣ୍ଡନ: ଦୀପାବଳି ଉତ୍ସବ ଅବ୍ୟବହିତ ପୂର୍ବରୁ ବ୍ରିଟିସ୍ ପ୍ରଧାନମନ୍ତ୍ରୀ ଋଷି ସୁନକ ଇଂଲଣ୍ଡ ଓ ସମଗ୍ର ବିଶ୍ବରେ ଥିବା ହିନ୍ଦୁ ସମ୍ପ୍ରଦାୟଙ୍କୁ ଆନ୍ତରିକ ଶୁଭେଚ୍ଛା ଜଣାଇବା ସହିତ ‘୧୦ ଡାଉନିଙ୍ଗ୍ ଷ୍ଟ୍ରିଟ୍’ରେ ଥିବା ଆବାସିକ କାର୍ଯ୍ୟାଳୟରେ ବିଶେଷ କାର୍ଯ୍ୟକ୍ରମ ଆୟୋଜନ କରିଥିଲେ। ଏହି ହର୍ଷୋତ୍ଫୁଲ୍ଲିତ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଋଷି ସୁନକ ଓ ସ୍ତ୍ରୀ ଅକ୍ଷତା ମୂର୍ତ୍ତିଙ୍କ ସହିତ ହିନ୍ଦୁ ସମ୍ପ୍ରଦାୟର ଅନେକ ଅତିଥି ଯୋଗ ଦେଇଥିଲେ। ସାମାଜିକ ଗଣମାଧ୍ୟମ ‘ଏକ୍ସ’ ପୋଷ୍ଟ୍ରେ ସୁନକଙ୍କ କାର୍ଯ୍ୟାଳୟ କହିଛି: ଅନ୍ଧକାର ଉପରେ ଆଲୋକର ବିଜୟ ପର୍ବ ଦୀପାବଳି ପୂର୍ବରୁ ଆଜି ରାତିରେ ପ୍ରଧାନମନ୍ତ୍ରୀ ଋଷି ସୁନକ ହିନ୍ଦୁ ସମ୍ପ୍ରଦାୟଙ୍କୁ ଡାଉନିଙ୍ଗ୍ ଷ୍ଟ୍ରିଟ୍କୁ ସ୍ବାଗତ କରିଥିଲେ। ଏ ସପ୍ତାହାନ୍ତରେ ଦୀପାବଳି ପାଳନ କରୁଥିବା ଇଂଲଣ୍ଡ ଓ ସମଗ୍ର ବିଶ୍ବରେ ବାସ କରୁଥିବା ସମସ୍ତଙ୍କୁ ଶୁଭ ଦୀପାବଳି ଶୁଭେଚ୍ଛା।
ଏହି ପୋଷ୍ଟ୍ରେ ଆବାସିକ କାର୍ଯ୍ୟାଳୟରେ ପ୍ରଧାନମନ୍ତ୍ରୀ ସୁନକ ଓ ସ୍ତ୍ରୀ ଅକ୍ଷତା ପାରମ୍ପରିକ ଦୀପ ପ୍ରଜ୍ଜ୍ବଳନ କରୁଥିବା ଫଟୋ ଏବଂ ଉତ୍ସବକାଳୀନ ଆଉ କିଛି ଫଟୋ ମଧ୍ୟ ସେୟାର୍ କରାଯାଇଛି। ଆଉ ଏକ ଫଟୋରେ ଦେଖାଯାଉଛି ସୁନକ ହିନ୍ଦୁ ସମ୍ପ୍ରଦାୟ ଲୋକମାନଙ୍କ ସହିତ ଆଳାପ କରୁଛନ୍ତି। ସେମାନେ ମଧ୍ୟ ପ୍ରଧାନମନ୍ତ୍ରୀ ସୁନକଙ୍କୁ ଭେଟିବାର ସୁଯୋଗ ପାଇ ଥିବାରୁ କୃତ୍ୟ କୃତ୍ୟ ହୋଇଯାଉଥିବା ପରି ଦିଶୁଛନ୍ତି। ସୂଚନାଯୋଗ୍ୟ, ସାଉଥ୍ଆମ୍ପ୍ଟନ୍ରେ ଜନ୍ମ ହୋଇଥିବା ହିନ୍ଦୁ ଧର୍ମାବଲମ୍ବୀ ସୁନକଙ୍କର ପୂର୍ବଜ ଥିଲେ ପଞ୍ଜାବୀ। ସାଉଥ୍ଆମ୍ପ୍ଟନ୍ରେ ସେ ନିୟମିତ ଭାବେ ହିନ୍ଦୁ ମନ୍ଦିରକୁ ଦିଅଁ ଦର୍ଶନ କରିବାକୁ ଯାଆନ୍ତି। ସେପ୍ଟେମ୍ବର ମାସରେ ଭାରତରେ ଆୟୋଜିତ ‘ଜି୨୦’ ଶିଖର ସମ୍ମିଳନୀରେ ଯୋଗ ଦେବାକୁ ଆସିଥିବା ସୁନକ ନୂଆଦିଲ୍ଲୀସ୍ଥିତ ଅକ୍ଷରଧାମ ମନ୍ଦିରକୁ ଯାଇଥିଲେ।
