ନୂଆଦିଲ୍ଲୀ: ମଧ୍ୟପ୍ରଦେଶର ଇନ୍ଦୋରରେ ଟିସିଏସ୍ ଓ ଇନ୍ଫୋସିସ୍ ପରିସରରେ କଲରାପତରିଆ ବାଘ ବୁଲୁଥିବା ଘଟଣାକୁ ନେଇ ଭୟର ବାତାବରଣ ଖେଳି ଯାଇଛି। ବାରମ୍ବାର କମ୍ପାନି ପରିସରରେ ବାଘ ବୁଲିଥିବା ଘଟଣା ସାମ୍ନାକୁ ଆସିବା ପରେ ଇନଫୋସିସ୍ ଓ ଟିସିଏସ୍ ପକ୍ଷରୁ କର୍ମଚାରୀଙ୍କ ପାଇଁ ନୂତନ ବିଜ୍ଞପ୍ତି ପ୍ରକାଶ ପାଇଛି। ଏହି ବିଜ୍ଞପ୍ତି ଅନୁଯାୟୀ, ‘ ଇନଫୋସସିସ୍ କର୍ମଚାରୀଙ୍କୁ ୱାର୍କ ଫ୍ରମ୍ ହୋମ୍ (ଘରେ ରହି କାମ) କରିବାକୁ ନିର୍ଦ୍ଦେଶ ଦିଆଯାଇଛି। ଏଭଳି ନିଷ୍ପତ୍ତି ନେବାର ପ୍ରଥମ କାରଣ ହେଲା କର୍ମଚାରୀମାନେ କାର୍ଯ୍ୟାଳୟକୁ ଆସିବାକୁ ଭୟ କରିବେ ନାହିଁ। ଦ୍ଵିତୀୟଟି ହେଲା ଘରେ ରହି କାମ କରିବା ଦ୍ୱାରା କର୍ମଚାରୀଙ୍କୁ ବାଘ ଆକ୍ରମଣର ଭୟ ରହିବ ନାହିଁ। ସେମାନେ ନିର୍ଭୟରେ କାମ କରି ପାରିବେ।
ଟିସିଏସ୍ ଓ ଇନ୍ଫୋସିସ୍ କମ୍ପାନିରେ ପ୍ରାୟ ୧୨ ହଜାରରୁ ଅଧିକ କର୍ମଚାରୀ କାମ କରୁଛନ୍ତି। ପ୍ରତ୍ୟେକ କର୍ମଚାରୀଙ୍କୁ ଅଫିସ କରିଡର୍ରେ ବୁଲିବାକୁ ବାରଣ କରାଯିବା ସହିତ ଗତମଙ୍ଗଳବାର ଯେଉଁ କର୍ମଚାରୀମାନେ ସକାଳ ସିଫ୍ଟରେ ଆସିଥିଲେ ସେମାନଙ୍କୁ ଛୁଟି ସମୟ ପୂର୍ବରୁ ଛାଡ଼ି ଦିଆଯାଇଥିଲା। ଏହିସହିତ ରାତି ସିଫ୍ଟର କମର୍ଚାରୀଙ୍କୁ ସନ୍ଧ୍ୟା ପୂର୍ବରୁ ଆସିବାକୁ କୁହାଯାଇଥିଲା। ଇନ୍ଦୋରର ସୁପର କରିଡୋର ଅଞ୍ଚଳରେ ମଙ୍ଗଳବାର ସକାଳ ୧୧ଟାରୁ ୧୨ଟା ମଧ୍ୟରେ ଏକ କଳରାପତରିଆ ବାଘ ବୁଲୁଥିବା ଦେଖିବାକୁ ମିଳିଥିଲା। ଏହାପରେ ବନ ବିଭାଗକୁ ଖବର ଦିଆଯାଇଥିଲା। ଖବର ପାଇ ଏକ ଟିମ୍ ପହଞ୍ଚି ଉକ୍ତ ବାଘକୁ ଧରିବା ପାଇଁ ସର୍ଚ୍ଚ ଅପରେସନ୍ ଜାରି ରଖିଛନ୍ତି। ବାଘ ରେସ୍କ୍ୟୁ ଅପରେସନ୍ ପୂରଣ ନହେବା ଯାଏଁ ଟିସିଏସ୍ ଓ ଇନ୍ଫୋସିସ୍ ଉଭୟ ସଫ୍ଟଓ୍ୱେୟାର କମ୍ପାନି କିଛି କର୍ମଚାରୀଙ୍କୁ ଅଫିସରୁ ବାହାରକୁ ନ ବାହାରିବା ପାଇଁ ସତର୍କ କରିବା ସହିତ ଅନେକ କର୍ମଚାରୀଙ୍କୁ ମେଲ ଜରିଆରେ ୱାର୍କ ଫର୍ମ ହୋମ ପାଇଁ କହିଛି।
