ନୂଆଦିଲ୍ଲୀ: ଆଫଗାନିସ୍ତାନ ବିପକ୍ଷରେ ଖେଳାଯାଇଥିବା ପ୍ରଥମ ଦିନିକିଆରେ ଇତିହାସ ରଚିଛନ୍ତି ଶ୍ରୀଲଙ୍କାର ବ୍ୟାଟ୍ସମ୍ୟାନ ପଥୁମ ନିଶଙ୍କା। ନିଶଙ୍କା ୧୩୯ ବଲରେ ୨୦ ଚୌକା ଓ ୮ ଛକା ସାହାଯ୍ୟରେ ଅପରାଜିତ ୨୧୦ ରନ୍ ସଂଗ୍ରହ କରିଥିଲେ, ଯାହା ସହ ସେ ଶ୍ରୀଲଙ୍କା ପକ୍ଷରୁ ଦିନିକିଆ କ୍ରିକେଟରେ ଦ୍ୱିଶତକ ହାସଲ କରିବାରେ ପ୍ରଥମ ବ୍ୟାଟ୍ସମ୍ୟାନ୍ ହୋଇଥିଲେ। ଶ୍ରୀଲଙ୍କା ଓ ଆଫଗାନିସ୍ତାନ ମଧ୍ୟରେ ପ୍ରଥମ ଦିନିକିଆ ପଲ୍ଲେକେଲରେ ଖେଳାଯାଉଛି, ଯେଉଁଥିରେ ପଥୁମ ନିସାଙ୍କା ଏହି ଚମତ୍କାର ଦ୍ୱିଶତକ ହାସଲ କରିଛନ୍ତି। ଓପନିଂରେ ଓହ୍ଲାଇଥିବା ନିସାଙ୍କା ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ଅର୍ଥାତ୍ ସେ ପୂରା ୫୦ ଓଭର ବ୍ୟାଟିଂ କରିଥିଲେ। କୌଣସି ଆଫଗାନିସ୍ତାନ ବୋଲର ନିସାଙ୍କାଙ୍କୁ ଆଉଟ୍ କରିପାରିନଥିଲେ, ସମସ୍ତେ ସେମାନଙ୍କ ସାମ୍ନାରେ ଅସହାୟ ଦେଖାଯାଉଥିଲେ।
ଦ୍ୱିଶତକ ପୂର୍ବରୁ ଶ୍ରୀଲଙ୍କାର ଏହି ଓପନର ମାତ୍ର ୮୭ ବଲରେ ଶତକ ପୂରଣ କରିଥିଲେ। ନିଶଙ୍କାଙ୍କ ଦିନିକିଆ କ୍ୟାରିୟରର ଏହା ଥିଲା ଚତୁର୍ଥ ଶତକ। ସେହିପରି ଆଫଗାନିସ୍ତାନ ବିପକ୍ଷରେ ତାଙ୍କ ବ୍ୟାଟରୁ ଏହା ପ୍ରଥମ ଶତକ ବାହାରିଥିଲା। ଏଠାରେ ଉଲ୍ଲେଖଯୋଗ୍ୟ ଯେ ଭାରତ ପକ୍ଷରୁ ସଚ୍ଚିନ ତେନ୍ଦୁଲକର ପ୍ରଥମ ବ୍ୟାଟ୍ସମ୍ୟାନଭାବେ ୨୦୧୦ରେ ଦ୍ୱିଶତକ ମାରିଥିଲେ। ତାଙ୍କ ପରେ ବୀରେନ୍ଦ୍ର ସେହଓ୍ବାଗ, ରୋହିତ ଶର୍ମା, ଶୁଭମନ ଗିଲ୍ ଓ ଇଶାନ କିଷନ ମଧ୍ୟ ଦିନିକିଆରେ ଦ୍ୱିଶତକ ଅର୍ଜନ କରିଛନ୍ତି।
