ଭୁବନେଶ୍ୱର: କରୋନା ସଂକ୍ରମଣ ମୁକାବିଲା ଲାଗି ଆଜି ରାଜ୍ୟ ସରକାର ଏକ ଅଭୂତପୂର୍ବ ପଦକ୍ଷେପ ଗ୍ରହଣ କରିଛନ୍ତି। ଦେଶର ପ୍ରଥମ ରାଜ୍ୟ ଭାବେ ଓଡ଼ିଶା ବିଦେଶରୁ ଆସୁଥିବା ବ୍ୟକ୍ତିଙ୍କ ପଞ୍ଜୀକରଣକୁ ବାଧ୍ୟତାମୂଳକ କରିଛି। ଯେହେତୁ କରୋନା ସଂକ୍ରମଣ ମୁଖ୍ୟତଃ ବିଦେଶ ଫେରନ୍ତା ବ୍ୟକ୍ତିଙ୍କ ଠାରେ ଦେଖାଯାଉଛି ତେଣୁ ସେମାନଙ୍କୁ ଚିହ୍ନଟ କରିବା ଜରୁରୀ ହୋଇପଡ଼ିଛି। ଏହାକୁ ବିଚାରକୁ ନେଇ ରାଜ୍ୟ ସରକାର ବିଦେଶରୁ ଆସିଥିବା ଅଥବା ଆସିବାକୁ ଚାହୁଁଥିବା ବ୍ୟକ୍ତିଙ୍କର ପଞ୍ଜୀକରଣ ବାଧ୍ୟତାମୂଳକ କରିଛନ୍ତି। ଏଭଳି ଏକ ପଦକ୍ଷେପ ନେବାରେ ଓଡ଼ିଶା ଦେଶର ପ୍ରଥମ ରାଜ୍ୟ ଭାବେ ପରିଗଣିତ ହୋଇଛି। ରାଜ୍ୟ ସରକାରଙ୍କ ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ଆଜି ଅପରାହ୍ନ ୪.୩୦ ମିନିଟ ସମୟରେ ସ୍ଥାନୀୟ ଗୀତ ଗୋବିନ୍ଦ ଭବନରେ ଆୟୋଜିତ ‘କରୋନା’ ସମ୍ପର୍କିତ ସାମ୍ବାଦିକ ସମ୍ମିଳନୀରେ ଯୋଗ ଦେଇ ରାଜ୍ୟର ମୁଖ୍ୟଶାସନ ସଚିବ ଅସିତ ତ୍ରିପାଠୀ ଘୋଷଣା କରିଛନ୍ତି ଯେ ବିଦେଶରୁ ଆସିଥିବା ପ୍ରତିଟି ବ୍ୟକ୍ତିଙ୍କର ପଞ୍ଜିକରଣ କରାଯାଇ ସେମାନଙ୍କୁ ଚିହ୍ନଟ କରାଯିବ। ଏହାପରେ ସେମାନଙ୍କୁ ଆବଶ୍ୟକ ଅନୁଯାୟୀ ପରାମର୍ଶ ଦିଆଯିବ। ଏହି ପଦକ୍ଷେପ ଜରିଆରେ କରୋନା ସଂକ୍ରମଣକୁ ରୋକାଯାଇ ପାରିବ ବୋଲି ସେ ଆଶା ପ୍ରକାଶ କରିଛନ୍ତି।
ସୂଚନା ଅନୁସାରେ, ବିଦେଶରୁ ଓଡ଼ିଶା ଆସିଥିବା ଅଥବା ଆସିବାକୁ ଚାହୁଁଥିବା ବ୍ୟକ୍ତି ପ୍ରଥମେ ଟୋଲ ଫ୍ରି ନମ୍ବର-୧୦୪ ଜରିଆରେ ନିଜର ପଞ୍ଜୀକରଣ କରାଇବେ। ଏହାବ୍ୟତୀତ ରାଜ୍ୟସରକାର ନୂତନ ଭାବେ ଆରମ୍ଭ କରିବାକୁ ଯାଉଥିବା ୱେବସାଇଟ୍ ‘COVID19.ODISHA.GOV.IN’ ଜରିଆରେ ଅନଲାଇନରେ ମଧ୍ୟ ଏହି ପଞ୍ଜୀକରଣ କରାଇ ପାରିବେ। ଯେଉଁମାନେ ଓଡ଼ିଶା ଆସି ସାରିଛନ୍ତି ସେମାନେ ତୁରନ୍ତ ପଞ୍ଜୀକରଣ କରାଇ ନେବାକୁ କହିଛନ୍ତି ସରକାର। ଓଡ଼ିଶାରେ ପହଞ୍ଚିବାର ୨୪ଘଣ୍ଟା ମଧ୍ୟରେ ପଞ୍ଜୀକରଣ କରିବା ଜରୁରୀ। ଏଥିସହ ଯେଉଁମାନେ ମାର୍ଚ୍ଚ ୪ ତାରିଖ ପରେ ରାଜ୍ୟକୁ ଆସିଛନ୍ତି ସେମାନେ ଆସନ୍ତା ୪୮ଘଣ୍ଟା ମଧ୍ୟରେ ପଞ୍ଜୀକରଣ କରିବା ବାଧ୍ୟତାମୂଳକ କରାଯାଇଛି । ଏହି ବ୍ୟବସ୍ଥା ଏପ୍ରିଲ ୧୫ ତାରିଖ ପର୍ଯ୍ୟନ୍ତ ବଳବତ୍ତର ରହିବ ବୋଲି ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି। ଯେଉଁମାନେ ପଞ୍ଜୀକରଣ କରିବେ ନାହିଁ ସେମାନଙ୍କ ବିରୋଧରେ ଅପରାଧିକ ମାମଲା ରୁଜୁ ହୋଇ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଇପାରିବ। ଉଲ୍ଲେଖଯୋଗ୍ୟ, ପଞ୍ଜୀକରଣ କରିଥିବା ବ୍ୟକ୍ତିଙ୍କୁ ୧୫,୦୦୦ଟଙ୍କା ଲେଖାଏଁ ସହାୟତା ଦିଆଯିବ। ଏଥିସହ ଯଦି ବ୍ୟକ୍ତି ଜଣକ ନିଜେ ପଞ୍ଜୀକରଣ କରିପାରୁ ନାହାନ୍ତି ତେବେ ତାଙ୍କ ଲାଗି ତାଙ୍କର ସମ୍ପର୍କୀୟ ଓ ବନ୍ଧୁବାନ୍ଧବ ବି ପଞ୍ଜୀକରଣ କରି ପାରିବେ। ପଞ୍ଜୀକରଣ ପରେ ଉକ୍ତ ବ୍ୟକ୍ତିଙ୍କୁ ତାଙ୍କ ବାବଦରେ ତଥ୍ୟ ମଗାଯିବ। ଯେଉଁ ତଥ୍ୟ ଦେବା ଲାଗି ସେ ବାଧ୍ୟ। ଏହାପରେ ଯଦି ଆବଶ୍ୟକ ହୁଏ ତେବେ ଉକ୍ତ ବ୍ୟକ୍ତିଙ୍କୁ ତାଙ୍କ ଘରେ କ୍ୱାରେଣ୍ଟାଇନ୍ରେ ରଖାଯିବ ବୋଲି ରାଜ୍ୟ ସରକାରଙ୍କ ପକ୍ଷରୁ ମୁଖ୍ୟସଚିବ ଅସିତ ତ୍ରିପାଠୀ ଘୋଷଣା କରିଛନ୍ତି। ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗଚୀ, ସୂଚନା ଓ ଲୋକ ସମ୍ପର୍କ ବିଭାଗ ସଚିବ ସଞ୍ଜୟ ସିଂ ପ୍ରମୁଖ ଉପସ୍ଥିତ ଥିଲେ।
କରୋନା ମୁକାବିଲା: ବିଦେଶରୁ ଆସିଥିବା ବ୍ୟକ୍ତିଙ୍କ ପଞ୍ଜୀକରଣ ବାଧ୍ୟତାମୂଳକ କଲେ ରାଜ୍ୟ ସରକାର, ଉଲ୍ଲଂଘନ କଲେ ଦଣ୍ଡିତ ହେବେ
Share Now: