ମାଲକାନଗିରି: ମାଲକାନଗିରି ଜାତୀୟ ରାଜପଥ ୩୨୬ ଉପରେ ହୁତୁହୁତୁ ହୋଇ ଜଳିଗଲା ଗୋଟିଏ କାର। ଏମଭି-୧୬ ଗ୍ରାମ ନିକଟରେ ଏଭଳି ଏକ ଘଟଣା ଆଜି ସକାଳୁ ଘଟିଯାଇଛି। କାରଟି ମୁଖ୍ୟ ରାସ୍ତା କଡରେ ଥିବାବେଳେ ସେଥିରେ କୌଣସି ପ୍ରକାରେ ନିଆଁ ଲାଗିଯାଇଥିଲା। ସୌଭାଗ୍ୟ ବଶତଃ ସେହି ଗାଡ଼ିଟିରେ କୌଣସି ଲୋକନଥିବାରୁ କେହି ମୃତାହତ ହୋଇନାହାନ୍ତି।ତେବେ ଗାଡିଟି ସମ୍ପୂର୍ଣ୍ଣ ଭାବରେ ଜଳିପୋଡ଼ି ନଷ୍ଟ ହୋଇଯାଇଛି। ଖବର ପାଇ ଦମକଳ ବାହିନୀ ପହଂଚି ନିଆଁକୁ ଆୟତ୍ତ କରିଛନ୍ତି।
ଖବର ନେବାରୁ ଜଣାପଡିଛି ଯେ ସେହି ଗାଡ଼ିଟିରେ ବହୁ ପରିମାଣରେ ଗଞ୍ଜେଇ ଚାଲାଣ ହେଉଥିଲା। ନିଆଁ ଲାଗିବାପରେ ଗାଡ଼ିଟିକୁ ଛାଡ଼ିଦେଇ ଡ୍ରାଇଭର କିମ୍ବା ଗାଡି ମାଲିକ ଫେରାର ହୋଇଯାଇଛନ୍ତି। କିଛି ଦିନ ଭିତରେ ଗଞ୍ଜେଇ ଚାଲାଣ ରାକେଟ ସକ୍ରିୟ ଥିବାବେଳେ ପୋଲିସକୁ କିଛି ସଫଳତା ମଧ୍ୟ ମିଳିଛି। ଗାଡିଟି କାହାର ଏବଂ ସେଥିରେ କିଭଳି ନିଆଁ ଲାଗିଲା ସେ ନେଇ କୌଣସି ସ୍ପଷ୍ଟ ତଥ୍ୟ ମିଳି ପାରିନାହିଁ। ତେବେ ପୋଲିସ ଏହି ଘଟଣାର ଛାନଭିନ ଆରମ୍ଭ କରିଛନ୍ତି।