ବାଲେଶ୍ବର: ରାଜ୍ୟରେ ଜାରି ରହିଥିବା ଲଗାଣ ବର୍ଷା ହେତୁ ଚାରିଆଡେ ଜଳମଗ୍ନ ହୋଇଯାଇଛି। ଏହି ବର୍ଷା ହେବା ପରେ ଜଳକା ନଦୀର ଜଳସ୍ତର ବିପଦ ସଂକେତ ଉପରେ ପ୍ରବାହିତ ହେଉଛି। ଲଘୁଚାପ କାରଣରୁ ଗତ ୨ ଦିନ ଧରି ବସ୍ତା ଅଞ୍ଚଳରେ ଲଗାଣବର୍ଷା ଲାଗିରହିଛି। ଏହାର ପ୍ରଭାବରୁ ନଦୀର ଉପରମୁଣ୍ଡରେ ପ୍ରବଳ ବର୍ଷା ହେବା ପରେ ଜଳକା ଜଳସ୍ତର ବୃଦ୍ଧି ପାଇଛି। ଫଳରେ ବାଲେଶ୍ୱର ଜିଲ୍ଲାର ବସ୍ତା ବ୍ଲକ ଦେଇ ପ୍ରବାହିତ ହେଉଥିବା ଜଳକା ନଦୀର ଜଳସ୍ତର କ୍ରମଶଃ ବଢିବାରେ ଲାଗିଛି। ବସ୍ତାରେ ଜଳକା ଏବେ ବିପଦ ସଂକେତ ଅତିକ୍ରମ କରିଛି। ମଥାନୀ ଠାରେ ବିପଦ ସଂକେତ ୫.୫୦ ମିଟର ରହିଛି। ସକାଳ ୮ଟା ସୁଦ୍ଧା ଜଳସ୍ତର ୫.୯୦ ମିଟରରେ ପ୍ରବାହିତ ହେଉଛି। ନଦୀର ଉପରମୁଣ୍ଡରେ ଥିବା ମୟୂରଭଂଜ ଜିଲ୍ଲାର ରାସଗୋବିନ୍ଦପୁର, ମୋରଡା, ଚିତ୍ରଡା, ସୁଳିଆପଦା ଅଞ୍ଚଳରେ ପ୍ରବଳ ବର୍ଷା ପରେ ତଳ ମୁଣ୍ଡରେ ଫୁଲି ଉଠିଛି ଜଳକା ନଦୀ। ପ୍ରବଳ ବର୍ଷା ଲାଗି ରହିଲେ ପୁଣି ଥରେ ବନ୍ୟା ସ୍ଥିତି ଦେଖାଦେବ ବୋଲି ଆଶଙ୍କା ଉପୁଜିଛି। ବସ୍ତା ବ୍ଲକର ୭ଟି ପଞ୍ଚାୟତରେ ବନ୍ୟା ସ୍ଥିତି ସହ ହଜାର ହଜାର ହେକ୍ଟର ଚାଷ ଜମି ଜଳମଗ୍ନ ହେବା ଆଶଙ୍କାରେ ଅଛନ୍ତି ଚାଷୀ।
