ଭୁବନେଶ୍ୱର: କେନ୍ଦ୍ରାପଡ଼ା ଜିଲ୍ଲା ସୂଚନାଧିକାର କର୍ମୀ ରଂଜନ ଦାସ ହତ୍ୟାକାଣ୍ଡକୁ ଇତିମଧ୍ୟରେ ୪୦ଦିନ ବିତିଗଲାଣି। ମାତ୍ର ପୁଲିସ କୌଣସି ଅଭିଯୁକ୍ତକୁ ଗିରଫ କରିବାରେ ସଫଳ ହୋଇନାହିଁ। ତଦନ୍ତକୁ ଚାପି ଦେବା ଲାଗି ପୁଲିସ ପ୍ରଚେଷ୍ଟା ଜାରି ରଖିଛି ବୋଲି ଅଭିଯୋଗ ହୋଇଛି। ତେଣୁ ହତ୍ୟାକାଣ୍ଡର ସିବିଆଇ ତଦନ୍ତ କରାଗଲେ ପ୍ରକୃତ ଘଟଣା ସାମ୍ନାକୁ ଆସିପାରିବ ବୋଲି ଓଡ଼ିଶା ସୂଚନା ଅଧିକାର ଅଭିଯାନ ବା ଓସା ପକ୍ଷରୁ ଦାବି କରାଯାଇଛି। ଆଜି ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଓସାର ରାଜ୍ୟ ଆବାହକ ପ୍ରଦୀପ ପ୍ରଧାନ କହିଲେ, ନିଜ ଜୀବନ ପ୍ରତି ବିପଦ ଥିବା ଦର୍ଶାଇ ରଂଜନ ଦାସ ପାଟକୁରା ଓ ମାର୍ଶାଘାଇ ଥାନାରେ ଅଭିଯୋଗ କରିଥିଲେ ହେଁ ପୁଲିସ ଅଭିଯୋଗକୁ ପଞ୍ଜୀକୃତ କରି ନ ଥିଲା। ଓସା ପକ୍ଷରୁ ପୁଲିସ ମହାନିର୍ଦ୍ଦେଶକଙ୍କୁ ଭେଟି ଉଚ୍ଚସ୍ତରୀୟ ତଦନ୍ତ ଦାବି କରାଯାଇଥିଲେ ହେଁ ମହାନିର୍ଦ୍ଦେଶକ କୌଣସି ତଦନ୍ତ କରାଇ ନାହାନ୍ତି। ଏହା ଭିତରେ ରାଜ୍ୟ ମାନବାଧିକାର କମିସନ, ଲୋକାୟୁକ୍ତ, ସୂଚନା କମିସନ, ଜାତୀୟ ଅନୁସୂଚିତ ଜାତି କମିସନ, ଜାତୀୟ ମାନବାଧିକାର କମିସନ ସରକାରଙ୍କୁ ନୋଟିସ୍ ଜାରି କରିଛନ୍ତି। ମାତ୍ର ପୁଲିସ ଏହି ହତ୍ୟାକାଣ୍ଡକୁ ଦୁର୍ଘଟଣାର ରୂପ ଦେବା ପାଇଁ ଉଦ୍ୟମ କରୁଛି। ତେଣୁ ରଂଜନ ଦାସ ହତ୍ୟାକାଣ୍ଡର ତଦନ୍ତ ଓଡ଼ିଶା ପୁଲିସ ଦ୍ୱାରା କରାଗଲେ ତାହା ନିରପେକ୍ଷ ହୋଇପାରିବ ନାହିଁ। ଏହି ଘଟଣାର ସିବିଆଇ ତଦନ୍ତ କରାଯିବାକୁ ଓସା ପକ୍ଷରୁ ଦାବି କରାଯାଇଥିବା ଶ୍ରୀ ପ୍ରଧାନ କହିଛନ୍ତି। ଏହି ପରିପ୍ରେକ୍ଷୀରେ ବୁଦ୍ଧିଜୀବୀ, ସୂଚନାଧିକାର କର୍ମୀ, ମାନବାଧିକାର କର୍ମୀଙ୍କୁ ନେଇ ଆସନ୍ତା ମାର୍ଚ ୧୯ତାରିଖରେ ନବୀନ ନିବାସ ଘେରାଉ କରାଯିବା ପାଇଁ ନିଷ୍ପତ୍ତି ନିଆଯାଇଛି। ଏହି ସାମ୍ବାଦିକ ସମ୍ମିଳନୀରେ ପୂର୍ବତନ ବିଧାୟକ ବିପିନ ଦାସ, ସୁଧୀର ମହାନ୍ତି, ସଂଯୁକ୍ତା ପାଣିଗ୍ରାହୀ, ଶ୍ରୀକାନ୍ତ ପାକଳ, ଜିତେନ୍ଦ୍ର ସାହୁ ଓ ଅନ୍ୟମାନେ ଉପସ୍ଥିତ ଥିଲେ।
ସୂଚନାଧିକାର କର୍ମୀ ରଂଜନ ଦାସ ହତ୍ୟାର ସିବିଆଇ ତଦନ୍ତ ଦାବି:୧୯ରେ ନବୀନ ନିବାସ ଘେରିବ ଓସା
Share Now: