ପାଟନା : ଇସ୍ଲାମୀୟ ମୌଳବାଦୀ ସଂଗଠନ ପପୁଲାର ଫ୍ରଣ୍ଟ ଅଫ ଇଣ୍ଡିଆ (ପିଏଫଆଇ)ର ଏକ ବଡ଼ ଷଡ଼ଯନ୍ତ୍ରର ପର୍ଦ୍ଦାଫାସ କରିଛି ବିହାର ପୁଲିସ। ୨୦୪୭ ସୁଦ୍ଧା ଭାରତରେ ଇସ୍ଲାମୀୟ ଶାସନ ପ୍ରତିଷ୍ଠା କରିବା ଦିଗରେ ଏହି ସଂଗଠନ କାମ କରୁଥିବା ଜଣାପଡ଼ିଛି। ଗତ ଜୁଲାଇ ୧୨ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିହାର ଗସ୍ତ ସମୟରେ ଏହି ସଂଗଠନ ପକ୍ଷରୁ ତାଙ୍କୁ ଟାର୍ଗେଟ କରିବାକୁ ଷଡ଼ଯନ୍ତ୍ର କରାଯାଇଥିଲା ବୋଲି ବିହାର ପୁଲିସ ଜାଣିପାରିଛି। ଏହି ମଡ୍ୟୁଲର ୨ ଜଣ ସଦସ୍ୟ ଅଥର ପରଭେଜ ଓ ମହମ୍ମଦ ଜଲାଲୁଦ୍ଦିନଙ୍କୁ ଗିରଫ କରାଯାଇଛି। ଗୁରୁତ୍ବପୂର୍ଣ୍ଣ କଥା ହେଉଛି ଜଲାଲୁଦ୍ଦିନ ପୂର୍ବରୁ ଝାଡ଼ଖଣ୍ଡ ପୁଲିସରେ ଜଣେ ଅଫିସର ଭାବେ କାମ କରୁଥିଲା। ସେ ପିଏଫଆଇର ସଦସ୍ୟମାନଙ୍କୁ ଅସ୍ତ୍ରଶସ୍ତ୍ର ତାଲିମ ପ୍ରଦାନ କରୁଥିଲା। ସେହିପରି ପରଭେଜ୍ ପୂର୍ବରୁ ସିମିର ସଦସ୍ୟ ଥିଲା। ଏବେ ସେ ପିଏଫଆଇର ସଦସ୍ୟ ଅଛି। ଏହି ଦୁଇ ଆତଙ୍କବାଦୀ ମୋଦୀଙ୍କ ଗସ୍ତର ୧୫ ଦିନ ପୂର୍ବରୁ ଫୁଲଓ୍ବାରି ସରିଫଠାରେ ତାଲିମ ନେଇଥିଲେ। ମୋଦୀଙ୍କୁ ହତ୍ୟା ଷଡ଼ଯନ୍ତ୍ରକୁ ସାକାର କରିବାକୁ ସେମାନେ ଜୁଲାଇ ୬ ଓ ୭ରେ ଏକ ବୈଠକ କରିଥିଲେ। ତେବେ ବିହାର ପୁଲିସ ଫୁଲଓ୍ବାରି ସରିଫ ଉପରେ ଚଢଉ ବେଳେ ଏହି ଷଡ଼ଯନ୍ତ୍ରର ପର୍ଦ୍ଦାଫାସ ହୋଇଥିଲା। ଏହି ଡଢଉ ସମୟରେ ପୁଲିସକୁ କେତେକ ଗୁରୁତ୍ବପୂର୍ଣ୍ଣ କାଗଜପତ୍ର ମିଳିଛି। କେତେକ କାଗଜପତ୍ରରୁ ଜଣାପଡ଼ିଛି ଯେ, ଆସନ୍ତା ୨୦୪୭ ସୁଦ୍ଧା ଭାରତରେ ଇସ୍ଲାମୀୟ ଶାସନ ପ୍ରତିଷ୍ଠା କରିବା ଲାଗି ପିଏଫଆଇ କାମ କରୁଛି।
ପିଏଫଆଇର ଲକ୍ଷ୍ୟ : ୨୦୪୭ ସୁଦ୍ଧା ଭାରତରେ ଇସ୍ଲାମୀୟ ଶାସନ
Share Now: