କିବ୍ : ୟୁକ୍ରେନ ଉପରେ ରୁଷ ପ୍ରବଳ ଆକ୍ରମଣ ଚଳାଇଥିବାବେଳେ ୟୁକ୍ରେନ ସେନା ବି ତାହାର କଡ଼ା ଜବାବ ଦେଇଚାଲିଛି। ଗତ ୨୪ ଘଣ୍ଟା ମଧ୍ୟରେ ୟୁକ୍ରେନର ସଶସ୍ତ୍ର ବାହିନୀର କ୍ଷେପଣାସ୍ତ୍ର ଏବଂ ଆର୍ଟିଲିରୀ ୟୁନିଟ୍ ଦକ୍ଷିଣ ଦିଗରେ ଶତ୍ରୁ ସ୍ଥିତିକୁ ଲକ୍ଷ୍ୟ କରି ୨୪୬ ଟି ରକେଟ୍ ନିକ୍ଷେପ କରିଛି। ଏହା ଦ୍ୱାରା ରୁଷପକ୍ଷର ଅନେକ କ୍ଷୟକ୍ଷତି ହୋଇଥିବା ୟୁକ୍ରେନ ଦାବି କରିଛି। ଏସବୁ ଆକ୍ରମଣ ରୁଷର ମୋର୍ଟାର ଓ ଆର୍ଟିଲାରି ସିଷ୍ଟମକୁ ଲକ୍ଷ୍ୟ କରି କରାଯାଇଛି। ୟୁକ୍ରେନ ସେନାର ଏହି ଆକ୍ରମଣ ଦ୍ୱାରା ରୁଷର ୩ଟି ଟ୍ୟାଙ୍କ, ଓସା ମିସାଇଲ ସିଷ୍ଟମ, ୬ଟି ଯୁଦ୍ଧଯାନ ସମେତ ୪୦ ଜଣ ରୁଷ ସୈନ୍ୟ ନିହତ ହୋଇଛନ୍ତି। ଏହା ସହିତ ବେରିସ୍ଲାଭ ଓ କାଖୋଭକା ଜିଲ୍ଲାରେ ଥିବା ଗୋଳାବାରୁଦ ଡିପୋ ନଷ୍ଟ ହୋଇଯାଇଛି। ୬ ଟି ଟ୍ୟାଙ୍କ ସାମାନ୍ୟ ଭାବେ କ୍ଷତିଗ୍ରସ୍ତ ହୋଇଛି ବୋଲି ୟୁକ୍ରେନର ସମ୍ବାଦ ସରବରାହ ସଂସ୍ଥା ୟୁକ୍ରେନିନଫର୍ମ କହିଛି। ଅନ୍ୟପକ୍ଷରେ ୟୁକ୍ରେନର ବିଦ୍ୟୁତ କେନ୍ଦ୍ର ଉପରେ ରୁଷର ଆକ୍ରମଣ ଜାରି ରହିଛି। ଏପରିକି ରୁଷ ପକ୍ଷରୁ ୟୁକ୍ରେନର ସୋଲାର ପ୍ଲାଣ୍ଟଗୁଡିକ ଉପରେ ବି ଆକ୍ରମଣ କରାୟାଉଛି। ୟୁକ୍ରେନ ପକ୍ଷରୁ ଆମେରିକା ପ୍ରଦତ୍ତ ଦୂରଗାମୀ କ୍ଷେପଣାସ୍ତ୍ର ବ୍ୟବହାର କରି ରୁଷ ଉପରେ ଆକ୍ରମଣ କରାଯାଉଥିବାରୁ ବିଦ୍ୟୁତ କେନ୍ଦ୍ର ଉପରେ ଆକ୍ରମଣ କରି ୟୁକ୍ରେନର ଯୋଗାଯୋଗ ବ୍ୟବସ୍ଥା ଓ ଆକ୍ରମଣ କ୍ଷମତାକୁ ହ୍ରାସ କରିବାକୁ ଉଦ୍ୟମ କରୁଛି। ରୁଷ ଦ୍ୱାରା ଦକ୍ଷିଣ ୟୁକ୍ରେନର ଅଧିକୃତ ଅଞ୍ଚଳକୁ ଛଡ଼ାଇବାକୁ ୟୁକ୍ରେନ ସେନା ପ୍ରବଳ ପ୍ରତିଆକ୍ରମଣ କରିଚାଲିଛି। ତେବେ ଏ ନେଇ ସଫଳତା ମିଳିପାରିନାହିଁ।
