କୁଆଡେ ଗଲା ନାଗ ଗଙ୍ଗାରେ ବୁଡ଼ ପକେଇଥିବା ନେତା ଅଫିସରଙ୍କ ତାଲିକା
ଭୁବନେଶ୍ୱର: ରାଜଧାନୀ ଭୁବନେଶ୍ୱରର ବହୁଚର୍ଚ୍ଚିତ ଲେଡି ବ୍ଲାକମେଲର ଅର୍ଚ୍ଚନା ନାଗର ସମ୍ପତ୍ତି ବାଜ୍ୟାପ୍ତ ହେବ। ଅର୍ଚ୍ଚନା ନାଗ, ଜଗବନ୍ଧୁ ଚାନ୍ଦ ଓ ଖଗେଶ୍ୱରର ସମ୍ପତ୍ତି ବାଜ୍ୟାପ୍ତି ନେଇ ପ୍ରକ୍ରିୟା ଆରମ୍ଭ ହୋଇଯାଇଛି। ଜେଲ ଯାଇ ଅର୍ଚ୍ଚନା, ଜଗବନ୍ଧୁ ଓ ଖଗେଶ୍ୱରକୁ ନୋଟିସ କରିବ ପ୍ରବର୍ତ୍ତନ ନିର୍ଦ୍ଦେଶାଳୟ। ଏଥିପାଇଁ ଦିଲ୍ଲୀ ଆଡଜୁଡିକେଟିଂ ଅଥରିଟିଙ୍କୁ ଜଣାଇଥିଲା ଇଡି। ଜବତ ହୋଇଥିବା ସମ୍ପତି କାହିଁକି ବାଜ୍ୟାପ୍ତ ହେବ ନାହିଁ, ସେ ନେଇ ତିନି ଜଣଙ୍କୁ ନୋଟିସ୍ ପଠାଇଛି ଇଡି। ସେପଟେ ମନି ଲଣ୍ଡରିଂ ମାମଲାରେ ଅର୍ଚ୍ଚନା ନାଗଙ୍କ ରିମାଣ୍ଡ ଅବଧି ଶେଷ ହେବା ପରେ ତାଙ୍କୁ ଜେଲ ପଠାଯାଇଥିଲା।
ସୂଚନାଯୋଗ୍ୟ, ଲେଡି ବ୍ଲାକମେଲର ଅର୍ଚ୍ଚନା ନାଗ, ସ୍ୱାମୀ ଜଗବନ୍ଧୁ ଚାନ୍ଦ ଓ ସହଯୋଗୀ ଖଗେଶ୍ୱର ପାତ୍ର ଏବେ ଝାରପଡ଼ା ଜେଲରେ ଅଛନ୍ତି। ଅର୍ଚ୍ଚନା ନାଗ ମାମଲା ନେଇ ପ୍ରବର୍ତ୍ତନ ନିର୍ଦ୍ଦେଶାଳୟ ତଦନ୍ତ କରୁଛି। କମ ସମୟ ମଧ୍ୟରେ ଅର୍ଚ୍ଚନା ନାଗ କେମିତି କୋଟିପତି ହୋଇପାରିଲା ସେ ନେଇ ଇଡି ତଦନ୍ତ ଜାରି ରଖିଛି। ତେବେ ସାଧାରଣରେ ପ୍ରଶ୍ନବାଚୀ ସୃଷ୍ଟି ହେଉଛି ଯେ ନାଗ ଗଙ୍ଗାରେ ବୁଡ଼ ପକେଇଥିବା ନେତା ଓ ଅଫିସରଙ୍କ ତାଲିକା କେବେ ସାର୍ବଜନୀନ ହେବ ? କେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ଅଦାଲତ ଅଥବା ସରକାର?
