ରାୟଗଡା: ଗଞ୍ଜେଇ ଚୋରା ଚାଲାଣ ପାଇଁ ଭିନ୍ନ ଭିନ୍ନ ଉପାୟ ଆପଣାଉଥିବାର ଆପଣ ଅନେକ ସମୟରେ ପଢୁଥିବେ। ତେବେ ରାୟଗଡା ରେଳ ସୁରକ୍ଷା ବଳ ଏଭଳି ଏକ ଗ୍ୟାଙ୍ଗକୁ ଗିରଫ କରିଛି ଯେଉଁମାନେ ସୁଟକେସରେ ଗଞ୍ଜେଇ ଚୋରାଚାଲାଣ କରୁଥିଲେ। ମିଳିଥିବା ସୂଚନା ମୁତାବକ ଗତକାଲି ବିଶ୍ୱସ୍ତ ସୂତ୍ରରୁ ରେଳସୁରକ୍ଷା ବଳଙ୍କୁ ସୂଚନା ମିଳିଥିଲା ଯେ ବିଶାଖାପାଟଣା-ଦୁର୍ଗ ଏକ୍ସପ୍ରେସ ମାଧ୍ୟମରେ ବିପୁଳ ପରିମାଣର ଗଞ୍ଜେଇ ଚୋରାଚାଲାଣ କରାଯାଉଛି।
ଏହାପରେ ରାୟଗଡାରେ ଟ୍ରେନ ପହଞ୍ଚିବା ପରେ ରେଳ ସୁରକ୍ଷାବଳ ପକ୍ଷରୁ ଟ୍ରେନରେ ଯାଞ୍ଚ କରାଯାଇଥିଲା। ଏହାପରେ ଏସି ବଗିରେ ଯାଉଥିବା ୫ ଜଣ ଯାତ୍ରୀଙ୍କୁ ନେଇ ସନ୍ଦେହ ଉପୁଜିଥିଲା। ସେମାନଙ୍କ ପାଖରେ ବଡ ବଡ ସୁଟକେଶ ଥିବାବେଳେ ଏଥିରେ କଣ ଅଛି ପଚାରିବାରୁ ସେମାନେ ଏନେଇ ସୂଚନା ଦେଇପାରିନଥିଲେ। ଏହାପରେ ସୁଟକେଶକୁ ଖୋଲାଯିବାରୁ ଏଥିରୁ ବିପୁଳ ପରିମାଣର ଗଞ୍ଜେଇ ଜବତ ହୋଇଥିଲା। ଏହାପରେ ଆରପିଏଫ ସୁଟକେଶ ନେଇକି ଯାଉଥିବା ୫ ଜଣ ଅଭିଯୁକ୍ତଙ୍କୁ ଗିରଫ କରିଛି। ଏହି ଅଭିଯୁକ୍ତମାନେ ହେଉଛନ୍ତି ଉତ୍ତରପ୍ରଦେଶ ଆଲିଗଡର ଅସଲମ, ଇମ୍ରାନ ଖାନ, ତାହିର, ଜାଫରୁଦ୍ଦିନ, ଅଦନାନ। ଏମାନଙ୍କ ନିକଟରୁ ୧୭୦ କିଲୋଗ୍ରାମ ଗଞ୍ଜେଇ ଜବତ କରାଯାଇଥିବାବେଳେ ଏହାର ଆନୁମାନିକ ମୂଲ୍ୟ ପ୍ରାୟ ୧୭ ଲକ୍ଷ ଟଙ୍କା ହେବ ବୋଲି ଜଣାପଡିଛି।
ସୁଟକେସରେ ଚାଲାଣ ହେଉଥିଲା ଗଞ୍ଜେଇ : ରେଳଷ୍ଟେସନରୁ ଧରାପଡ଼ିଲେ ୫ ଅଭିଯୁକ୍ତ
Share Now: