ଭାଗଲପୁର: ଇଚ୍ଛା ନଥାଇ ବି ବାପା ଋଣ ଶୁଝିନପାରିବାରୁ ୫୨ବର୍ଷୀୟ ବ୍ୟକ୍ତିଙ୍କୁ ବିବାହ କଲେ ନାବାଳିକା। ବିହାରର ଭାଗଲପୁରରେ ଘଟିଛି ଏଭଳି ଆଶ୍ଚର୍ଯ୍ୟ କଲା ଭଳି ଘଟଣା। ଝାଡ଼ଖଣ୍ଡରେ ରହୁଥିବା ଜଣେ ବାପା ତାଙ୍କର ୧୬ ବର୍ଷର ଝିଅକୁ ୫୨ବର୍ଷ ବୟସ୍କ ବ୍ୟକ୍ତିଙ୍କ ସହ ବିବାହ କରାଇଥିଲେ। ନାବାଳିକାଜଣକ ବିବାହ କରିବାକୁ ଚାହୁଁନଥିଲେ ବି ତାଙ୍କ ବାପା ବାଧ୍ୟ କରି ତାଙ୍କର ବିବାହ କରାଇଥିଲେ। ଏବେ ନାବାଳିକା ନ୍ୟାୟ ପାଇଁ ସୋସିଆଲ ମିଡିଆରେ ଭିଡିଓ ଜାରି କରିଛନ୍ତି। ୧୬ବର୍ଷର ଝିଅ କହିଛନ୍ତି ଯେ ସେ ଅଧ୍ୟୟନ କରିବାକୁ ଚାହୁଁଛନ୍ତି ଏବଂ ତାଙ୍କୁ ଏହି ବିବାହରୁ ମୁକ୍ତ କରାଯିବା ଉଚିତ୍।
ଭାଇରାଲ ଭିଡିଓରେ ନାବାଳିକା କହୁଛନ୍ତି ଯେ “ମୋ ବାପା ଋଣ ପରିଶୋଧ ନକରିପାରିବାରୁ ୫୨ବର୍ଷୀୟ ବ୍ୟକ୍ତିଙ୍କ ସହ ମୋର ବିବାହ କରାଇଦେଲେ। ମୋର ବୟସ ୧୬ବର୍ଷ ଏବଂ ମୋ ସ୍ୱାମୀଙ୍କ ବୟସ ୫୨ବର୍ଷ। ବାପାଙ୍କ ଉପରେ ବହୁତ ଋଣ ଥିବାରୁ ଋଣ ଦେଇଥିବା ବ୍ୟକ୍ତି ମୋ ବାପାଙ୍କୁ ମୋ ହାତ ମାଗିଥିଲେ। ଯଦି ଋଣ ନଦେଇପାରିବ ତେବେ ଝିଅ ସହ ବିବାହ କରାଇଦିଅ ବୋଲି କହିଥିଲେ ମୋ ସ୍ୱାମୀ। ମୁଁ ମନା କରିବା ପରେ ବି ମୋ ବାପା ମୋତେ ତାଙ୍କ ସହିତ ବିବାହ କରାଇଥିଲେ। ଜୁଲାଇରେ ମୋର ବିବାହ ହୋଇଥିଲା। ବିବାହକୁ ମୁଁ ବହୁତ ବିରୋଧ କରିଥିଲି କିନ୍ତୁ କେହି ମୋ କଥା ଶୁଣିନଥିଲେ। ବିବାହ ପରେ ମୁଁ ବିହାରର ଭାଗଲପୁରରେ ପହଞ୍ଚିବା ପରେ ମୋ ସ୍ୱାମୀ ମୋତେ ପ୍ରତିଦିନ ପିଟିବା ଆରମ୍ଭ କରିଥିଲେ। ସେ ପ୍ରତିଦିନ ମୋ ସହିତ ଜବରଦସ୍ତ ଶାରୀରିକ ସମ୍ପର୍କ ସ୍ଥାପନ କରୁଛନ୍ତି। ମୁଁ ତାଙ୍କ ସହ ରହିବାକୁ ଚାହୁନାହିଁ। ମୋତେ ଏ ବିବାହରୁ ମୁକ୍ତ କରନ୍ତୁ।”
