ନୂଆଦିଲ୍ଲୀ: ସମଗ୍ର ମାନବଜାତିର କଲ୍ୟାଣ ପାଇଁ ବିଶ୍ୱବ୍ରହ୍ମାଣ୍ଡକୁ ଭଲ ରୂପେ ଜାଣିବା ପାଇଁ ଆମର ବୈଜ୍ଞାନିକ ପ୍ରଚେଷ୍ଟା ଚାଲିବ ବୋଲି ଆଜି ‘ଇସ୍ରୋ’ର ସୂର୍ଯ୍ୟ ଅଭିଯାନ ‘ଆଦିତ୍ୟ ଏଲ୍ ୧’ର ସଫଳ ଉତ୍କ୍ଷେପଣ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବୈଜ୍ଞାନିକମାନଙ୍କୁ ଅଭିନନ୍ଦନ ଜଣାଇ କହିଛନ୍ତି। ସାମାଜିକ ଗଣମାଧ୍ୟମ ‘ଏକ୍ସ’ରେ ପ୍ରଧାନମନ୍ତ୍ରୀ ଲେଖିଛନ୍ତି, ଚନ୍ଦ୍ରଯାନ-୩ର ସଫଳତା ପରେ ଭାରତ ତା’ର ମହାକାଶ ଯାତ୍ରା ଜାରି ରଖିଛି। ଭାରତର ପ୍ରଥମ ସୌର ଅଭିଯାନ ‘ଆଦିତ୍ୟ-ଏଲ୍୧’ର ସଫଳ ଉତ୍କ୍ଷେପଣ ଲାଗି ‘ଇସ୍ରୋ’ରେ ଥିବା ଆମ ବୈଜ୍ଞାନିକ ଓ ଇଞ୍ଜିନିୟର୍ମାନଙ୍କୁ ଅଭିନନ୍ଦନ ଜଣାଉଛି। ସମଗ୍ର ମାନବଜାତିର ମଙ୍ଗଳ ପାଇଁ ବିଶ୍ବବ୍ରହ୍ମାଣ୍ଡକୁ ଭଲରୂପେ ବୁଝିବା ଲାଗି ଆମର ନିଷ୍ଠାପର ବୈଜ୍ଞାନିକ ପ୍ରଚେଷ୍ଟା ଚାଲୁରହିବ। ସଫଳତାର ସହିତ ରକେଟ୍ରୁ ପୃଥକ୍ ହେବା ପରେ ଭାରତର ପ୍ରଥମ ସୌର ଅଭିଯାନ ‘ଆଦିତ୍ୟ-ଏଲ୍୧’ ପୃଥିବୀ ଚତୁଃପାର୍ଶ୍ଵରେ ନିର୍ଦ୍ଧାରଣ କରାଯାଇଥିବା ଡିମ୍ବାକାର କକ୍ଷପଥରେ ପ୍ରବେଶ କରିବା ପରେ ହର୍ଷୋତ୍ଫୁଲ୍ଲିତ ‘ଇସ୍ରୋ’ ମୁଖ୍ୟ ତାଙ୍କର ସାଥି ବୈଜ୍ଞାନିକ ଓ ଭାରତବାସୀଙ୍କୁ ଅଭିନନ୍ଦନ ଜଣାଇଥିଲେ।
‘ଇସ୍ରୋ’ ମୁଖ୍ୟ ସୋମନାଥ କହିଲେ, ଅଭିନନ୍ଦନ, ‘ଆଦିତ୍ୟ ଏଲ୍-୧’ ମହାକାଶ ଯାନକୁ ୨୩୫ x ୧୯,୫୦୦ କିଲୋମିଟର୍ବିଶିଷ୍ଟ ଡିମ୍ବାକାର କକ୍ଷପଥରେ ଛଡ଼ାଯାଇଛି। ‘ପିଏସ୍ଏଲ୍ଭି ସି-୫୭ ଆଦିତ୍ୟ-ଏଲ୍ ୧’ ଅଭିଯାନ ସମ୍ପନ୍ନ ହୋଇଛି ବୋଲି ପୃଥକୀକରଣ ହୋଇଥିବା କଥା ସୁନିଶ୍ଚିତ ହେବକ୍ଷଣି ‘ଇସ୍ରୋ’ର ଜଣେ କମାଣ୍ଡର୍ ଘୋଷଣା କରିଥିଲେ। ୪ ମାସର ଯାତ୍ରା କାଳରେ ସୂର୍ଯ୍ୟର ସବୁଠୁ ବାହାର ସ୍ତରକୁ ପର୍ଯ୍ୟବେକ୍ଷଣ କରିବା ଲାଗି ଏହି ଅଭିଯାନରେ ଆବଶ୍ୟକ ବୈଜ୍ଞାନିକ ଉପକରଣ ଯାଇଛି।