ଭୁବନେଶ୍ବର: ସ୍ବଳ୍ପ ଓ ମଧ୍ୟମ ଲକ୍ଷଣ ଥିବା କୋଭିଡ୍ ରୋଗୀଙ୍କୁ ଦିଆଯିବ ଆୟୁଷ-୬୪ ବଟିକା। ଭାରତୀୟ ଭେଷଜ ଗବେଷଣା ପରିଷଦ(ଆଇସିଏମ୍ଆର)ର ଜାତୀୟ କୋଭିଡ ଟାସ୍କଫୋର୍ସ ଏହାର ନିରୀକ୍ଷଣ କରିଥିବା ବେଳେ ଜାତୀୟ କ୍ଲିନିକାଲ ମ୍ୟାନେଜମେଣ୍ଟ ପ୍ରୋଟୋକଲରେ ଏହାକୁ ସାମିଲ କରାଯାଇଛି। ଏ ଦୃଷ୍ଟିରୁ ରାଜ୍ୟ ଆୟୁଷ ନିର୍ଦ୍ଦେଶାଳୟ ଏହି ଔଷଧ କୋଭିଡ୍ ରୋଗୀଙ୍କୁ ପ୍ରଦାନ କରିବା ଲାଗି ରାଜ୍ୟ ସରକାରଙ୍କୁ ପ୍ରସ୍ତାବ ଦେଇଥିବା ଜଣାପଡ଼ିଛି। ଯଦି ରାଜ୍ୟ ସରକାର ଏହାକୁ ଅନୁମୋଦନ କରନ୍ତି, ତାହାଲେ ରାଜ୍ୟରେ କୋଭିଡ ରୋଗୀଙ୍କ ଚିକିତ୍ସା କ୍ଷେତ୍ରରେ ଏହା ପ୍ରଥମ ଆୟୁଷ ଔଷଧ ହେବ ବୋଲି କୁହାଯାଉଛି। ଆୟୁଷ-୬୪ ଏକ ପଲି ହର୍ବାଲ ଫର୍ମୁଲେସନ୍ ହୋଇଥିବା ବେଳେ ଲକ୍ଷଣ ନ ଥିବା କିମ୍ବା, ସ୍ବଳ୍ପ, ମଧ୍ୟମ ଲକ୍ଷଣ ଥିବା ରୋଗୀଙ୍କ କ୍ଷେତ୍ରରେ ବେଶ୍ ଫଳପ୍ରଦ ହେଉଥିବା କୁହାଯାଉଛି। ଆୟୁଷ ମନ୍ତ୍ରଣାଳୟ-ସିଏସ୍ଆର ଯୁଗ୍ମ ନିରୀକ୍ଷଣ କମିଟି ଏହା କ୍ଲିନିକାଲ ପରୀକ୍ଷଣ କରିବା ପରେ ଔଷଧକୁ ବ୍ୟବହାର କରିବା ଲାଗି ପ୍ରସ୍ତାବ ଦେଇଥିଲା। ଦିଲ୍ଲୀ ଓ କିଛି ରାଜ୍ୟରେ ଏହି ଔଷଧ ପୂର୍ବରୁ ବିତରଣ କରାଯାଉଛି। ରାଜ୍ୟ ଆୟୁଷ ନିର୍ଦ୍ଦେଶାଳୟ ମଧ୍ୟ ଓଡ଼ିଶାରେ ଏହି ଔଷଧକୁ କୋଭିଡ ରୋଗୀଙ୍କୁ ଦେବା ଲାଗି ପ୍ରସ୍ତାବ ଦେଇଛି।
ମିଳିଥିବା ସୂଚନା ଅନୁସାରେ, ଗତକାଲି ନିର୍ଦ୍ଦେଶାଳୟ ପକ୍ଷରୁ ଏ ନେଇ ରାଜ୍ୟ ସରକାରଙ୍କ କୋଭିଡ ବୈଷୟିକ କମିଟିକୁ ଏ ସଂପର୍କିତ ପ୍ରସ୍ତାବ ଦିଆଯାଇଥିଲା। କମିଟି ଏହାକୁ ରାଜ୍ୟ ସରକାରଙ୍କୁ ବିଚାର କରିବା ଲାଗି ପଠାଇ ଦେଇଛି। କିଭଳି ଭାବେ ରୋଗୀଙ୍କୁ ଏହି ଔଷଧ ପ୍ରଦାନ କରାଯିବ ନିର୍ଦ୍ଦେଶାଳୟ ତାହାର ଏକ ପ୍ରୋଟୋକଲ ମଧ୍ୟ ପ୍ରସ୍ତୁତ କରିଛି। ଯଦିଓ ରାଜ୍ୟରେ ଏବେ କରୋନା ସଂକ୍ରମଣ କମିବାରେ ଲାଗିଛି; ଖୋର୍ଧା, କଟକ, ଯାଜପୁର, ବାଲେଶ୍ବର ଭଳି ଜିଲ୍ଲାରେ ଏବେ ବି ସ୍ଥିତି ନିୟନ୍ତ୍ରଣକୁ ଆସି ନାହିଁ। ଏସବୁ ଜିଲ୍ଲାରୁ ଶତାଧିକ ଆକ୍ରାନ୍ତ ଚିହ୍ନଟ ହେଉଛନ୍ତି। ତେଣୁ ସ୍ବଳ୍ପ, ମଧ୍ୟମ ଲକ୍ଷଣ ଥିବା ରୋଗୀଙ୍କୁ ଏହି ଔଷଧ ବିତରଣ ଉପରେ ରାଜ୍ୟ ସରକାର ଖୁବ୍ଶୀଘ୍ର ନିଷ୍ପତ୍ତି ନେଇପାରନ୍ତି। ପ୍ରଥମ ପର୍ଯ୍ୟାୟରେ ୨ଲକ୍ଷରୁ ଅଧିକ କ୍ୟାପସୁଲ କିଣାଯାଇ ରୋଗୀଙ୍କୁ ଦିଆଯିବାର ଯୋଜନା ରହିଛି। ମାତ୍ର ଏ ବାବଦ ଅର୍ଥ ଆୟୁଷ ନିର୍ଦ୍ଦେଶାଳୟ କିମ୍ବା ରାଜ୍ୟ ସରକାରଙ୍କ ପାଣ୍ଠିରୁ ଭରଣା କରାଯିବ ତାହା ସ୍ପଷ୍ଟ ହୋଇନାହିଁ। ରାଜ୍ୟ ଆୟୁଷ ନିର୍ଦ୍ଦେଶକ ତ୍ରିଲୋଚନ ମାଝୀ କହିଛନ୍ତି, ଆୟୁଷ-୬୪ କୋଭିଡ ରୋଗୀଙ୍କୁ ପ୍ରଦାନ କରିବା ଲାଗି ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଛି। ଏଥିପାଇଁ ଏକ କମିଟି ଗଠନ କରାଯାଇଛି। ଯଦି ରାଜ୍ୟ ସରକାର ଏହାକୁ ଅନୁମତି ପ୍ରଦାନ କରନ୍ତି, ତାହାଲେ କିଭଳି ଭାବେ ଏହାକୁ ରୋଗୀମାନଙ୍କୁ ଦିଆଯିବ, ତାହା ବିଚାର କରାଯାଉଛି। ରାଜ୍ୟ ସରକାର ଅନୁମତି ଦେବା ପରେ ହିଁ ସବୁ କିଛି ଆଗକୁ ବଢ଼ିବ ବୋଲି ଶ୍ରୀ ମାଝୀ କହିଛନ୍ତି।
