ନୂଆଦିଲ୍ଲୀ : ମାଓ ନେଟଓ୍ବାର୍କ ଠାବ କରିବାକୁ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) ପକ୍ଷରୁ ଆଜି ଆନ୍ଧ୍ରପ୍ରଦେଶ ଓ ତେଲେଙ୍ଗାନାର ୧୪ଟି ସ୍ଥାନରେ ଚଢଉ କରାଯାଇଛି । ୨୦୧୯ରେ ବସ୍ତରରେ ହୋଇଥିବା ମାଓବାଦୀ ଓ ସୁରକ୍ଷା ବାହିନୀ ଏନକାଉଣ୍ଟର ମାମଲାରେ ଏହି ଚଢଉ କରାଯାଇଥିବା ଏନଆଇଏ ପକ୍ଷରୁ କୁହାଯାଇଛି। ଚଢଉ କରାଯାଇଥିବା ୧୪ଟି ସ୍ଥାନ ମଧ୍ୟରେ ରହିଛି ହାଇଦ୍ରାବାଦ, ମେଡକ, ରାଚକୋଣ୍ଡା, ପ୍ରକାଶମ, ବିଶାଖାପାଟଣା, ନେଲୋର ଓ ବିଜୟଓ୍ବାଡା ଅନ୍ତର୍ଭୁକ୍ତ । ଏହି ଚଢଉ ବେଳେ ଗୁରୁତ୍ବପୂର୍ଣ୍ଣ କାଗଜପତ୍ର ଓ ଡିଜିଟାଲ ସାମଗ୍ରୀ, ମାଓ ସାହିତ୍ୟ ଜବତ ହୋଇଛି। ୨୮ ଜୁଲାଇ ୨୦୧୯ରେ ଛତିଶଗଡ଼ର ବସ୍ତରରେ ହୋଇଥିବା ମାଓବାଦୀ ଓ ସୁରକ୍ଷା ବାହିନୀ ଏନକାଉଣ୍ଟରରେ ୬ ଜଣ ମାଓବାଦୀ ଓ ଜଣେ ସାଧାରଣ ଲୋକ ପ୍ରାଣ ହରାଇଥିଲେ। ଏହି ଘଟଣାରେ ସେହିବର୍ଷ ବସ୍ତରରେ ଏକ ମାମଲା ରୁଜ୍ଜୁ ହୋଇଥିଲା। ତେବେ ଚଳିତ ବର୍ଷ ଏନଆଇଏ ଆଉ ଏକ ମାମଲା ରୁଜ୍ଜୁ କରି ତଦନ୍ତ ଚଳାଇଛି। ଏହି ମାମଲାରେ ଆଜି ଏନଆଇଏ କରିଥିବା ଚଢଉକୁ ଗୁରୁତ୍ବ ଦିଆଯାଉଛି। ଗଣମାଧ୍ୟମ ସୂଚନା ଅନୁସାରେ ଆନ୍ଧ୍ରପ୍ରଦେଶ ଓ ତେଲେଙ୍ଗାନାରେ ରହୁଥିବା ମାଓ ସମର୍ଥକ, ସାମାଜିକ କର୍ମୀଙ୍କ ଘର ଉପରେ ଚଢଉ କରାଯାଇଛି। ଆଜି ସକାଳ ୫ଟାରେ ବିପ୍ଲବୀ କବି ଜି.କଲ୍ୟାଣ ରାଓଙ୍କ ବାସଭବନ ଉପରେ ଏନଆଇଏ ଚଢଉ କରିଥିଲା।
