ଖୋର୍ଦ୍ଧା: ସୋମବାର ରାତି ପ୍ରାୟ ୧୦ଟା ବେଳେ ଖୋର୍ଦ୍ଧା ବାଟମଙ୍ଗଳା ଛକଠାରେ ଗୋସୁରକ୍ଷା କମିଟି, ବଜରଙ୍ଗଦଳର କର୍ମୀମାନେ ଖୋର୍ଦ୍ଧାରୁ ଉତ୍ତର ପ୍ରଦେଶ ପ୍ରାୟ ୧୦ କ୍ୱିଂଟାଲ୍ ଗୋମାଂସ ନେଇ ଯାଉଥିବା ଏକ ଟ୍ରକକୁ ଧରି ପୁଲିସକୁ ହସ୍ତାନ୍ତର କରିଛନ୍ତି। ଏହି ମାମଲାରେ ପୁଲିସ ଟ୍ରକ ଚାଳକ ସହ ୩ଜଣଙ୍କୁ ଅଟକ ରଖି ପଚାରାଉଚୁରା ଚଳାଇଛି।
ସୂଚନାନୁସାରେ, ଆଜି ଜଟଣୀ ବେଣାପଂଜରୀ ଓ ଖୋର୍ଦ୍ଧା ଉପକଣ୍ଠରୁ ଗୋମାଂସ ଧରି ଏକ ଟ୍ରକ (ୟୁପି ୨୧ଡିଟି ୨୪୮୫) ୧୬ ନମ୍ବର ଜାତୀୟ ରାଜପଥର ବାଟମଙ୍ଗଳା ବାଇପାସ୍ ଦେଇ ଯାଉଥଲା। ଏନେଇ ସୂଚନା ପାଇ ବଜରଙ୍ଗଦଳ, ଗୋସୁରକ୍ଷା କମିଟି, ହିନ୍ଦୁ ସୁରକ୍ଷା ବାହିନୀର ସଦସ୍ୟମାନେ ଟ୍ରକ ଟିକୁ ଅଟକାଇବାକୁ ଚେଷ୍ଟା କରିଥିଲେ। ତେବେ ଗାଡ଼ିଚାଳକ ଯୁବକମାନଙ୍କୁ ଉପରେ ଚଢ଼ାଇଦେବାକୁ ଉଦ୍ୟମ କରିଥିବା ବେଳେ ଦୈବାତ୍ ନିର୍ମାଣାଧୀନ ରାସ୍ତାତଳକୁ ଖସିଯାଇଥିଲା। ଯୁବକମାନେ ଟ୍ରକ ଚାଳକ ସହ ଦୁଇଜଣ ସହଯୋଗୀଙ୍କୁ ଧରି ଖୋର୍ଦ୍ଧା ଟାଉନ ଥାନା ପୁଲିସକୁ ସୂଚନା ଦେଇଥିଲେ। ପୁଲିସ ଟ୍ରକ୍ ସହ ତିନିଜଣକୁ ଥାନାକୁ ଆଣି ଅଟକ ରଖିଛି। ଟ୍ରକ୍ରେ ପ୍ରାୟ ୧୦ କ୍ୱିଂଟାଲ୍ ଗୋ ମାଂସ ରହିଛି। ଖବର ଲେଖିବା ବେଳକୁ ଏନେଇ ଥାନାରେ କୌଣସି ଲିଖିତ ଅଭିଯୋଗ ଦାଖଲ ହୋଇନଥିବା ବେଳେ ଜବତ ମାଂସର ପରୀକ୍ଷଣ ଓ କାଗଜପତ୍ର ଯାଞ୍ଚପରେ ଆବଶ୍ୟକ ପଦକ୍ଷେପ ନିଆଯିବ ବୋଲି ଥାନା ପକ୍ଷରୁ ସୂଚନା ଦିଆଯାଇଛି।
୧୦ କ୍ୱିଂଟାଲ୍ ଗୋମାଂସ ଜବତ : ୩ ଅଟକ
Share Now: