ଖଇରା: ଖଇରା ବ୍ଲକ୍ ଝିଙ୍କିରିଆ ପଞ୍ଚାୟତକୁ ପିଡିଏସ୍ ଚାଉଳ ନେଇ ଆସିଥିବା ଏକ ଟ୍ରକ୍ (ଓଡି-୦୧-ଟି-୧୫୬୬)କୁ ଅଟକାଇ କିଛି ଝିଙ୍କିରିଆ ଗ୍ରାମବାସୀ ଚାଉଳ ବସ୍ତା ବୋହି ନେଇଥିବା ଅଭିଯୋଗ ହୋଇଛି। ଘଟଣା ମୁତାବକ, ଝିଙ୍କିରିଆ ପଞ୍ଚାୟତ ପାଇଁ ରିଟେଲର୍ ଭାବେ ବାଉରି ଦାସ ନିଯୁକ୍ତ ହୋଇଛନ୍ତି। ଗତକାଲି ସଂଧ୍ୟାରେ ପିଡିଏସ୍ ଚାଉଳ ବୋଝେଇ ଏକ ଟ୍ରକ୍ ପଞ୍ଚାୟତରେ ପହଞ୍ଚିବା ପରେ ଝିଙ୍କିରିଆ ଗ୍ରାମର କିଛି ହିତାଧିକାରୀ ଟ୍ରକ୍ ନିକଟରେ ପହଞ୍ଚିଥିଲେ ଏବଂ ୪ ମାସର ବକେୟା ଚାଉଳ ଦେବାକୁ ଜିଦ୍ କରିଥିଲେ। ହେଲେ ରିଟେଲର୍ ଶ୍ରୀ ଦାସ କେବଳ ୨ ମାସର ବକେୟା ଚାଉଳ ଦିଆଯିବ ବୋଲି କହିଥିଲେ।
ଏପରି ସମୟରେ କିଛି ଲୋକ ଚାଉଳକୁ ଗୋଦାମରେ ନରଖି ପଞ୍ଚାୟତ କାର୍ଯ୍ୟାଳୟରେ ରଖିବାକୁ ଦାବି କରିଥିଲେ। ଯାହାକୁ ନେଇ ଉଭୟ ପକ୍ଷ ମଧ୍ୟରେ ବଚସା ହୋଇଥିଲା। କିଛି ଲୋକ ଟ୍ରକ୍ ଡ୍ରାଇଭର୍ ତାପସ ମୁଖୀଙ୍କଠାରୁ ଟ୍ରକ୍ ଚାବି ଛଡ଼ାଇ ଆଣିଥିଲେ ଏବଂ ଟ୍ରକ୍ରେ ଲଦା ହୋଇଥିବା ଚାଉଳ ବସ୍ତାଗୁଡ଼ିକ ମଧ୍ୟରୁ ୧୫୩ ବସ୍ତା ବୋହି ନେଇଥିଲେ। ଡ୍ରାଇଭର୍ ଶ୍ରୀ ମୁଖୀ ଏନେଇ ସିମୁଳିଆ ଥାନାରେ ଅଭିଯୋଗ କରିଥିବା ଜଣାପଡ଼ିଛି।
