ମୁମ୍ବାଇ: ନିକଟରେ ପଡ଼ୋଶୀ ରାଷ୍ଟ୍ର ପାକିସ୍ତାନକୁ ନୂତନ ଭାବେ ଆକ୍ରମଣ କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ। ସେ ଗୁରୁବାର କହିଛନ୍ତି ଯେ ଯଦି ପଡୋଶୀ ଦେଶ ନିଜକୁ ଅସମର୍ଥ ମନେ କରେ ତେବେ ଆତଙ୍କବାଦକୁ ରୋକିବା ପାଇଁ ଭାରତ ସହଯୋଗ କରିବାକୁ ପ୍ରସ୍ତୁତ ଅଛି। ଏଏନ୍ଆଇକୁ ଦେଇଥିବା ଏକ ସାକ୍ଷାତକାରରେ ରାଜନାଥ ସିଂ ଆହୁରି ମଧ୍ୟ ଚେତାବନୀ ଦେଇଛନ୍ତି ଯେ ଆତଙ୍କବାଦ ବ୍ୟବହାର କରି ଭାରତକୁ ଅସ୍ଥିର କରିବାକୁ ଚେଷ୍ଟା କଲେ ପାକିସ୍ତାନକୁ ତାହାର ପରିଣାମ ଭୋଗିବାକୁ ପଡ଼ିବ। ସାକ୍ଷାତକାରରେ ରାଜନାଥ ସିଂ, ଇନ୍ଦିରା ଗାନ୍ଧୀଙ୍କ ଯୁଗରେ ଜରୁରୀକାଳୀନ ସମୟ ବିଷୟରେ ମଧ୍ୟ କହିଥିଲେ। ବରିଷ୍ଠ ବିଜେପି ନେତା ମନେ ପକାଇ ଦେଇଛନ୍ତି ଯେ ତାଙ୍କ ମା’ଙ୍କ ଦେହାନ୍ତରେ ତାଙ୍କୁ କିପରି ପାରୋଲ ଦିଆଯାଇ ନଥିଲା।
ସେ କହିଛନ୍ତି ଯେ ‘‘ଜରୁରୀକାଳୀନ ସମୟରେ ମା’ଙ୍କ ଶେଷ ରୀତିନୀତିରେ ଯୋଗଦେବା ପାଇଁ ମୋତେ ପାରୋଲ ଦିଆଯାଇ ନଥିଲା ଏବଂ ବର୍ତ୍ତମାନ ସେମାନେ (କଂଗ୍ରେସ) ଆମକୁ ଏକଛତ୍ରବାଦୀ ଶାସକ ବୋଲି କହୁଛନ୍ତି।’’ ରାଜନାଥ ସିଂ ଏକ ଟିଭି ଚ୍ୟାନେଲକୁ ଦେଇଥିବା ସାକ୍ଷାତକାରରେ ପାକିସ୍ତାନ ଉପରେ ଏହି ମନ୍ତବ୍ୟ ଦେଇ କହିଛନ୍ତି ଯେ ସୀମା ପାର କରି ପଳାୟନ କରୁଥିବା ଆତଙ୍କବାଦୀଙ୍କୁ ହତ୍ୟା କରିବା ପାଇଁ ଭାରତ ଦେଶ ପାର୍ କରି ଯିବାକୁ ଦ୍ୱିଧା କରିବ ନାହିଁ। ସେ କହିଛନ୍ତି, ‘‘ଯଦି ଆତଙ୍କବାଦୀମାନେ ଭାରତରେ ଶାନ୍ତି ଭଙ୍ଗ କରିବାକୁ ଚେଷ୍ଟା କରନ୍ତି, ତେବେ ଆମେ ପଶିକରି ମାରିବୁ।’’
