ନକଲି ଏଫ୍ଆଇଆର୍ ଧରା ପଡ଼ିଲା, ଆତଙ୍କବାଦୀଙ୍କ ପ୍ରତି ଦରଦ
ଇସ୍ଲାମାବାଦ: ଇସ୍ଲାମିକ ଆତଙ୍କବାଦକୁ ପ୍ରୋତ୍ସାହନ ଦେଇ ଚାଲିଥିବା ପାକିସ୍ତାନ ସରକାର, ସେନା ଏବଂ ଗୁଇନ୍ଦା ସଂଗଠନ ଆଇଏସ୍ଆଇର ଅନେକ କୁତ୍ସିତ କାର୍ଯ୍ୟ ଏବେ ସାମ୍ନାକୁ ଆସିଛି। ଭାରତ, ଆଫଗାନିସ୍ତାନ ଏବଂ ବାଂଲାଦେଶ ବିରୋଧରେ ସକ୍ରିୟ ଥିବା ପ୍ରମୁଖ ଆତଙ୍କବାଦୀ ସଂଗଠନଗୁଡ଼ିକୁ ପାକିସ୍ତାନ ସରକାର ଆର୍ଥିକ ସହାୟତା ଯୋଗାଇ ଚାଲିଥିବା ବେଳେ ଏହାର ସେନା ଏବଂ ଗୁଇନ୍ଦା ବିଭାଗ ଆତଙ୍କବାଦୀଙ୍କୁ ତାଲିମ ପ୍ରଦାନ କରିବା ସହ ଅସ୍ତ୍ରଶସ୍ତ୍ର ଯୋଗାଉଛନ୍ତି। ଆତଙ୍କବାଦୀଙ୍କ ବିରୋଧରେ ଏବେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି ବିଶ୍ବ ସମୁଦାୟକୁ ଆଶ୍ବାସନା ଦେଇଥିବା ପାକିସ୍ତାନ ଅସଲରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିବା ଜଣାପଡ଼ିଛି। ପାକିସ୍ତାନର ସମସ୍ତ ଆତଙ୍କବାଦୀ ସଂଗଠନ ଏବଂ ଏହାର ମୁଖ୍ୟ ସଂଚାଳକମାନଙ୍କ ବିରୋଧରେ ବିଭିନ୍ନ ଥାନାରେ ରୁଜୁ ହୋଇଥିବା ଏଫ୍ଆଇଆର୍ ଜାଲ୍ ବୋଲି ଜଣାପଡ଼ିଛି। ଅନ୍ୟପକ୍ଷରେ ପାକିସ୍ତାନ ପୁଲିସ ମଧ୍ୟ ଆତଙ୍କବାଦୀଙ୍କ ବିରୋଧରେ କେବଳ କିଛି ଲୋକ ଦେଖାଣିଆ ପଦକ୍ଷେପ ନେଉଥିବା ବେଳେ ସେମାନଙ୍କୁ ସୁରକ୍ଷା ହିଁ ଯୋଗାଇ ଚାଲିଛି ବୋଲି ଫାଇନାନ୍ସିଆଲ୍ ଆକ୍ସନ ଟାସ୍କ ଫୋର୍ସ (ଏଫ୍ଏଟିଏଫ୍) ଜାଣିବାକୁ ପାଇଛି। ପାକିସ୍ତାନର ନକଲି ଏଫ୍ଆଇଆର୍ ଏବଂ ଆତଙ୍କବାଦୀଙ୍କ ପ୍ରତି ପୁଲିସ ଓ ସେନାର ଦରଦକୁ ଦେଖି ଏବେ ଏଫ୍ଏଟିଏଫ୍ ପାକିସ୍ତାନକୁ କଳା ତାଲିକାଭୁକ୍ତ କରିବାକୁ ଯୋଜନା କରୁଛି।
