ବ୍ରହ୍ମପୁର : ପୂର୍ବତନ କେନ୍ଦ୍ରମନ୍ତ୍ରୀ ଚନ୍ଦ୍ରଶେଖର ସାହୁ, ଏଆଇସିସି ସଦସ୍ୟ ତଥା ପିସିସି ସାଧାରଣ ସଂପାଦକ ବିକ୍ରମ କୁମାର ପଣ୍ଡା ଓ ଗଞ୍ଜାମ ଜିଲ୍ଲା କଂଗ୍ରେସ ସଭାପତି ଭଗବାନ ଗନ୍ତାୟତ ନିଜ ସମର୍ଥକଙ୍କ ସହ ଆଜି ବିଧିବଦ୍ଧ ଭାବେ କଂଗ୍ରେସରୁ ଇସ୍ତଫା ଦେଇଛନ୍ତି। ସେମାନେ ଆଜି ସଂଧ୍ୟାରେ ଏଆଇସିସି ଅଧ୍ୟକ୍ଷ ଓ ପିସିସି ସଭାପତିଙ୍କ ନିକଟକୁ ଇସ୍ତଫା ପତ୍ର ପଠାଇ ଦେଇଛନ୍ତି। ଦୀର୍ଘ ୪୦ ବର୍ଷ କଂଗ୍ରେସରେ ରହି ଆସିଥିବା ଶ୍ରୀ ସାହୁ ଜଣେ ଦୃଢ଼ ସଂଗଠକ ଭାବେ ପରିଚିତ। ଏଆଇସିସି ସଦସ୍ୟ ସହିତ ପିସିସି କାର୍ଯ୍ୟକାରୀ ସଭାପତି ପଦରେ ମଧ୍ୟ ରହିଥିଲେ। ସେ ଇସ୍ତଫାପତ୍ରରେ ଉଲ୍ଳେଖ କରିଛନ୍ତି, ବିଗତ ୯ ବର୍ଷ ଧରି ଦଳର ଆଭ୍ୟନ୍ତରୀଣ ସ୍ଥିତି ଓ ସାଂଗଠନିକ ନିଷ୍କ୍ରିୟତା ନେଇ ବହୁବାର ଆଲୋଚନା କରିଥିଲେ ସୁଦ୍ଧା କୌଣସି ସୁଫଳ ମିଳିଲା ନାହିଁ। ରାଜ୍ୟରେ ଦଳର ସ୍ଥିତି ଦେଖି ବାଧ୍ୟ ହୋଇ ଇସ୍ତଫା ପ୍ରଦାନ କରୁଛି ବୋଲି ସେ ଉଲ୍ଲେଖ କରିଛନ୍ତି।
ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀ ସାହୁଙ୍କ ସହିତ ପିସିସି ସାଧାରଣ ସଂପାଦକ ତଥା ନୂତନ ଭାବେ ଏଆଇସିସି ସଦସ୍ୟ ହୋଇଥିବା ବିକ୍ରମ କୁମାର ପଣ୍ଡା ଏବଂ ଦୀର୍ଘ ୧୦ ବର୍ଷ ଧରି ଜିଲ୍ଲା ସଭାପତି ରହି ଆସିଥିବା ଶ୍ରୀ ଗନ୍ତାୟତ ମଧ୍ୟ ନିଜର ଇସ୍ତଫାପତ୍ର ପିସିସି ସଭାପତି ଓ ଏଆଇସିସି ଅଧ୍ୟକ୍ଷଙ୍କୁ ପଠାଇ ଦେଇଛନ୍ତି। ଇସ୍ତଫା ଦେଇଥିବା ଅନ୍ୟ ନେତାଙ୍କ ମଧରେ ଅଛନ୍ତି ବ୍ରହ୍ମପୁର ଟାଉନ୍ କଂଗ୍ରେସ ସଭାପତି ସଂଜୀତ ପାଣିଗ୍ରାହୀ, ଏଲ୍ଓ୍ଵାଇସି ସଭାପତି ଅଜିତ ପଣ୍ଡା, ଏନ୍ଏସ୍ୟୁଆଇ ସଭାପତି ତାପସ ସାହୁ, ମହିଳା କଂଗ୍ରେସ ସଭାପତି ବି. ପୁଷ୍ପାବତୀ, ପିସିସି ସଦସ୍ୟ ଦୁର୍ଗାପ୍ରସାଦ ପଣ୍ଡା ଓ ମଳୟ ବିଷୋୟୀ, ପିସିସି ସମ୍ପାଦକ ତୁମ୍ବନାଥ ପଣ୍ଡା, ପ୍ରମୋଦ କୁମାର ବେବର୍ତ୍ତା ପଟ୍ଟନାୟକ, ଶୂନ୍ୟ ଚନ୍ଦ୍ର ଦାଶ, ପ୍ରକାଶ ବିଷୋୟୀ ପ୍ରମୁଖ।
